Dîlan Babat

 

ENQERE - Pîrebokê Kampusî Melîke Buyuk, dîyar kerd ke feshkerdişê pêkerdişê Stenbolî hêrişê hemverê destkewtişê cinîyan o. Paştdayîşê Morî Selda Kondakçi zî wina vat: "Pêkerdişê Stenbolî camê mabêne ma û kiştoxan de bi. La o cam bi destê dewlete ame şikitiş."

 

Hewteyê vîyarte de pêkerdişê Stenbolî bi qerarnameyê serekomarîye ame feshkerdiş. Pêkerdişo ke yew destkewtişê girîng yê cinîyan ameyîne vînayene, dimayê antişî rastê reaksîyonê pîlî ame. Cinî protestoyê xo meydanan de dewam kenê.

 

'Welat de rastîyêke şîdetî serê cinîyan de esto'

 

Pîrebokê Kampusî ra Melîke Buyuk dîyar kerd ke feshkerdişê pêkerdişî qerarêke şewêke de ameyo dayîş o û vat: "Yew sebebê qerarî oyo ke destkewtişê cinîyan çin bikerê. Tirkîya de şîdetê camêrdan zaf zêde yo. No welat de şîdet serê cinîyan de esto. No şîdet keye de kampus de û kuçeyan de bi. Pêkerdişê Stenbolî de madeyê ke vernîya şîdetî û tacîzî bigîrê estbî. Eke pêkerdiş bi ca bi ameyîne, do şîdet zî kêm bibîne. La çi heyf, keyeyo pîroz vejîya vernî û muhtewayê pêkerdişî veng kerdî û hewl danê ke rejîmêko newe awan bikerê."

 

'Qerarêkê sîyasî û polîtîk o'

 

Melîke dewam de wina vat: "Îqtîdar hetê şîdetî de tercîhê xo kerd. Dimayê feshkerdişî rojêke de 6 cinî ameyî kiştene. Serrêke de bi hezaran cinî rastê şîdetî yenê. La dimayê nê pêkerdişî, camêrdê ke cesaret girewtê do şîdet meşrû bikerê. Rêxistinê cinîyan demêke derg semedê pêkerdîşî kuçeyan de bî. Têkoşîn kerdêne. Nika semedo ke qerar bi ca bêro têkoşîn kenê. Ewro xeylêk cayê Tirkîya de cinî çalakîyan kenê. La ma destpêkê prosesêko derg de yê. Ma do têkoşîn xurt bikerê û vernîya nê bigîrê."

 

'Bêguman do no batax biresyayîne ma'

 

Piştevanîya Mor Selda Kondakçi zî dîyar kerd ke pêkerdiş temînatê pêro kesan bi û vat: "No bataxo ke îqtîdar awan kerd û her ca de vila bi, bêguman do biresayîne ma zî. Destkewtişê cinîyan ke bi têkoşînêke pîl ame girewtene, bêguman do vatişê yew kesî rê nêro verdayîş. Ma do têkoşîn bikerê û destûr nêdê. Heqê bîyayîşê ma fekê yew kesî de nîyo. No qerar semedê ma cinîyan derbasdar nîyo."

 

'Ma bi kiştoxanê xo dir têhet ê'

 

Selda eynî wextî de bale ant serê pêkerdişî û vat feshkerdiş hîna zaf cesaret dayo gumanbaran û nimûneyê ci wina vat: "Dimayê pêkerdişî 12 saetan de 6 cinî ameyî qetilkerdene. Pêkerdişê Stenbolî camê mabêne ma û kiştoxan de bi. O cam bi destê dewlete ame wedaritiş. Ma bi kiştoxan dir ameyî rî bi rî. Eke amanc pawitişê cinîyan bîne, do pêkerdiş nêameyîne feshkerdene.”

 

'Têkoşîn dano ciwîyayîş'

 

Selda vat, ê bi ferzkerdişê ‘cinîya makul’ dir ameyê rî bi rî û vat ganî cinî hemverê nê ferzkerdişan pîya têkoşîn bikerê û vat: "Semedê heqanê xo ma do têkoşîn bikerê û nê têkoşînî de ma do pîya bê. Têkoşîn dano ciwîyayîş."