Medya Uren

 

MÊRDÎN - Munever Akbulut ke bi hunerê telkarî dir eleqedar bena wina vat: "Hunerê telkarî, kulturê suryanîyan ra yeno û bi seserre yo ke yeno pawitene. Bi eleqedarbîyayîşê hunerê telkarî dir kulturêke pawena. Sey hemparê na herre, no karê ma pêrûne yo."

 

Mezopotamya kazanê huner û awankerdişî yo. Çiqas şer û asîmîlasyon ameyo kerdene zî heta nika warê hunerî de reyna zî rayberî keno. Hunerêko serê na herre de pêwa polîtîkayê asîmîlasyon û qirkerdişî serê lingan de mendo hunerê telkarî yo. Hunerê telkarî kulturêko kan ê Suryanîyan serê herra Mezopotamyayî yo. Bi seserran o Suryanî pisporîyê nê karî kenê. Sîm ra goşera, bazin, tac, gerdenî, xirxal, xizême û sewbîna xeylêk berardişê bînan viraznenê. Ma merkezê nê hunerî de qezaya Mîdyadê Mêrdînî de tay muşahede kerd.

 

Nika Mîdyad de bi humarêka kêm westayê nê karî mendê. Ma qezaya Mîdyadî de atolye û dikanê ke hunerê telkarî kenê, geyrayî. Xeylêk kesî bi nameyê, "Telkarî û çift" nê karî bi name kenê. Nînan ra yew pispora nê karî zî Munever Akbulut a. Munevere demêke derg o nê karî dir eleqedar bena û di serrî yo zî atolye akerda.

 

'Ganî ma kulturê xo bipawê'

 

Munevere bale ant serê girîngîyê hunerê telkarî û wina vat: "No karêko qedîm o tîya yo. Yanî bi sedserran o hetê Suryanîyan ra yeno pawitene. Ez kurmanc a, goreyê mi ganî ma sey hemparê na herre kulturê yewbînan bipawê. No berpirsyarîyê ma pêrûne yo. Bi taybetî zî ciwanî. Ez zî sey cinîyêke ciwane nê karî bi heskerdiş kena. Heta nika zî sey pisporêke karê xo kena."

 

Wexto ke merdim keweno dikan; goşera, bazin, gerdenî û xeylêk tewirê bînî bale ancenê û çimê merdimî înan ra nêbeno. Keda destan bi efsûnêke yeno kerdene. Ma kewtî atolyeya binê dikanî û ma dî ke makîneyan de sîm senî yeno veşnayene û senî yeno kerdene. Sewbîna ma bi hunerê Munevere dî ke tace senî yena viraştene. Munevere wexto ke tace viraştêne dîyar kerd ke sebir û kedêke pîl semedê nê karî lazim a.

 

'Ma xo resnenê her kesî'

 

Munevere vat ê xo resnenê her kesî û wina dewma kerd: "Semedê nexşê tenik û qij zî karê ma sebir û kede wazeno. Nexş, çiqas tenik û qiij bo tewr weşik beno.

 

Ma tîya nexş kenê û dikanan de roşenê. Bi taybetî zî serê hesabê medyaya komelî ma rotiş kenê. Semedê ke ma xo bi resnê her kesî ma torra medyayî zî xebitnenê. Ma goreyê waştişê merdiman zî nexş û sembolê ke ma sîm ra viraznenê dîyar kenê."

 

'Cinî eşkenê her karî de serkewte bê'

 

Munevere tewr peyîn wina vat: "Ma sey cinî her tewireşkenê serê linganê xo de bimanê. Ma eşkenê her tewir kar beikerê. Goreyê mi tewr weş zî cinî kenê. Mi bi keda xo dikanê xo awan kerd. No semedê mi serfirazî yo. Pêro cinîyê ciwanî eşkenê nê bikerê. Eynî wextî de  kesê ke biwazê xo biresnê ma zî ma do kêfweş bibê."