RIHA - Parlamentera HDPyî ya Rihayî Ayşe Surucu derheqê kampanyaya semedê ziwanê Kurdkî bibo ziwanê perwerde û fermî, qisey kerde û dîyar kerd ke sîstem, Kurdan û ziwanê înan çin hesibneno û vat: "Ganî her kes paştdayîş bido kampanya û wayîr vejîyo. Ziwan, nasname yo û bîyayîşê ma yo."

 

Hetê Platformê Ziwanê Kurdkî û Torra Kultur û Ziwanê Kurdkî ra Komîsyonê Ziwanî yê 21ê Sibate ame awankerdene û komîsyonî 22ê Sibate de kampanyaya îmzeyan ya semedê ke ziwanê Kurdkî bibo ziwanê perwerde û ziwano fermî dayî destpêkerdene. Çarçewaya kampanya de heta nika bi hezaran îmza ameyî komkerdene û kampanya do heta 15ê Gulane dewam bikero. Îmza zî do sazgehê fermî rê bêro erşawitiş.

 

Parlamentera HDPyî ya Rihayî Ayşe Surucu derheqê kampanya de qisey kerd.

 

'Ziwanê Kurdan çin yeno hesibnayîş'

 

Ayşe vat ke ê sey HDP hewl danê ke ziwanê Kurdkî her ware de bêro qisey kerdene û semedê nê kitabê kurdkî yenê wendiş û semedê nê perwerde yeno dayîş û vat: "Pêwa parlamenterê HDPyî hemserekî zî tewrê perwerdeyî benê. Hedefê oyo ke wendiş û nuştişê Kurdî her wareyê cuye de bibo. Ma do ziwanê Kurdkî bîyarê sewîyaya ziwanê sîyasetî. Roja ewro de Kurd û ziwanê Kurdkî yeno çinkerdene. Nameyê dewe, bajarok û kuçeyan yeno vurnayîş. Heto bîn ra zî tabelayê Kurdî fînenê war. Caardişê Paştdayîşê Lezabez ê Cinîyan (KADES) bi 6 ziwanan bernameyêk awan kerd, la tede Kurdkî çinbî."

 

'Her netew bi ziwanê xo esto'

 

Ayşe wina dewam kerd: "Sere de cinî û pêro xebatkarê partî ganî ziwan tewr zêde bikerê cuya xo. Ma paştdayîş danê kampanyaya Platformê Ziwanê Kurdî û Torra Kultur û Ziwanê Kurdî. Ma hewl danê ke xebatî tewr pîl bibê. Her netew bi ziwanê xo esto. Ziwan, nasname yo. Ziwan, kesan temsîl keno. Ma girîngî danê ziwan. La hema ziwanê Kurdkî çin yeno hesibnayîş. Ma do heta peynî hemverê asîmîlasyonî têkoşîn bikerê."

 

'Wayîrê kampanya yeno vetene'

 

Ayşe vat, Tirkîya de bi mîlyonan Kurd estê û ganî wayîrê ziwanê xo vejîyê û vat: "Pêwa tedayan, Kurdan tu wext fek nasnameyê xo ra vera nêda. Têkoşînê ma semedo ke ziwanê ma bibo ziwano fermî dewam bikero. Şaro Kurd wayîrê kampanya vejêno. Ganî ma her wareyê cuye semedoke ziwan bidê ciwîyayîş hewl bidê."

 

Ayşe tewr peyîn vat hîna xeylêk kesî kampanya ra xeberdar nîyê û semedê nê hewldayîş bibo û vat: "Her kes ganî wayîrê kampanya vejîyo. Ziwan nasnameyê ma yo, bîyayîşê ma yo. Wa keyeyî bi tutanê xo dir Kurdkî qisey bikerê. Wa cuya ma xeyalê ma bi Kurdî bê."