ENQERE - Pêwa muxabira ma Bêrîtan Canozer 22 cinî ameybî destbendkerdene. Cinîyan reaksîyon vera rewşe dayî û dîyar kerdî ke îqtîdar wazeno Jinnewsî ke vengê cinîyan bi komelî dir ano têhet bivisno û veng dayî pêro kesî kîşte TJA û Komeleya Cinîyan a Rosayî de ca bigîrê.

 

Amed de sereştişê keyeyan de pêwa muxabira ma Bêrîtane Canozer 22 cinî ameyî destbendkerdene. Sewbîna qerarê nimitişî dayî serê dosyaya cinîyan. Xeylêk cinîyan reaksîyon vera destbendkerdişan dayî û dîyar kerdî ke ganî bêrê veradayîş.

 

‘Komeleya Rosaye parçeyêk têkoşînê cinîyan a'

 

Sekretera Cinîyan a Konfederasyonê Sendîkayê Kedkarê Îstîmlakî (KESK) Gulîstan Atasoy reaksîyon vera destbendkerdişan da û vat, demê peyînan de hemverê destkewtişê cinîyan de hêrişê cidî yenê meydan û dewam de wina vat: "Sebebê hêrişê komeleyan no yo; TJA û Rosa herême de hêzê cinîyan ê têkoşer vet meydan. Komeleya Cinan a Rosaye zî parçeyêke destkewtiş û têkoşînê cinîyan o. Bajarê kurdan de semedê vînayîşê cinîyan yê komelî de û sazbîyayîşê komeleya cinîyan bi rayber. AKPyî dimayê 2015ine de sîyasetê şer, bi tayînkerdişê qeyûman hemberê sazgehan hêrişê cidî kerd."

 

'Ganî heme cinî kîşte Rosaye de ca bigîrê'

 

Gulîstane dîyar kerd ke Komeleya Cinan a Rosayî, dimayê tayînkerdişê qeyûman û padayîşê sazgehê cinîyan de vengê cinîyan bêro eşnawitiş û vat: " Komeleya Cinîyan a Rosaye de sazgehê cinîyan STK, rêxistinê komelê demokratîk, aktîvîstê cinîyan tewrê bîyê. Cinî nê komeleyî de ameyî têhet û hemverê şîdetê dewlete ya hemverê cinîyan ame kerdene, têkoşîn kerd. Komele hemverê şîdetê cinîyan têkoşîn kerd, bi tedayan yeno krîmînalîzekerdene. Semedê nê zî ganî pêro cinî kîşte Komeleya Cinîyan a Rosaye de ca bigîrê."

 

'Wazenê vengê Jinnewsî bibirnê'

 

Endama Meclîsê Cinîyan ê Partîya Demokratîke ya Şaran (HDP) Leman Kîraz zî dîyar kerd ke demê peyîn de bi hawayêke çimsûr verê xo dayî cinîyan û vat: "Cinîyê hemverê bêhuqûqîyê îqtîdarî wirzenê serê lingan, hedef yenê girewtene. Pêwa TJA û Komeleya Rosayî, hedefgirewtişê cinîyê çapemenî zî nê esasî de yê. Jinnews pêwa hêrişê îqtîdarî vengê cinîyan dano eşnawitiş. Îqtîdar nê baş zano; Jinnews rastîyan şarî rê neql keno. Semedê nê zî hewl danê ke vengê Jinnewsî bibirnê. Pêwa nê hêrişan do cinî xo ver bidê. Tu kes do cinîyan têkoşînê înan ra nêkero. Pêwa destbendkerdişan ma do wareyan de bê."

 

'Do cinî îqtîdarê înan birijnê'

 

Kolektîfê Cinîyan ê Unîversîta Nîsa Çira zî wina vat: "Sebebê destbendkerdişan tersê îqtîdarî ra yeno. La tepiştiş û destbendkerdişan nêeşkenê cinîyan pelçiqnenê. Îqtîdar heme sîyasetê xo serê cinîyan awan keno û têkoşînê rêxistinkerdişê yê cinîyan zî hemverê sîyasetê serdest yê camêrdan o. Semedê nê zî hêrişê têkoşînê cinîyan keno."