Sema Çaglak - Şehrîban Aslan 

 

AMED - Meslekdarê Berîtane waştî ke Berîtane lezabez serbest bêra veradayene. Dîcle Muftûoglu, dîyar kerd ke rojnamegerê cinî hedef yenê girewtene. Bahar Kiliçgedik, dîyar kerd ke rojnamegerî suc nîya. Safiye Alagaş zî dîyar kerd ke wazenê vengê çapemenîya azad bibirnê.

 

5ê nîsane de serê sibayî polîsan eşt serê xeylêk keyeyan û muxabira ma  Berîtan Canozer zî tede 22 cinî destbendkerdî. Sewbîna derheqê cipersayîşî de qeraro nimite ame dayene. Polîsan eşt serê keyeyê Berîtane ke qezaya Rezanî ya Amedî de yo. Polîsan, çîyê keyeyî vila kerdî û dest dayî serê xeylêk kitab û materyalê dîjîtal. Meslekdarê  Berîtane yê xebate, vengdayîşê paştdayîşê rojnamegeran kerdî û waştî Berîtane ganî serbest bêro veradayene.

 

Hemsereka Komeleya Rojnamegerê Dîcle Firat (DFG) û edîtora Ajansê Mezopotamyayî Dîcle Muftuoglu dîyar kerd ke Tirkîya semedê rojnamegeran açeryaya zîndano akerde û vat: "Çi heyf Tirkîya de her roje teda, destbendkerdene û tepiştişî yenê kerdene. Bi taybetî zî serê rojnamegerê kurdî nê tedayî tewr zêde beno. Yan zî her operasyonê sîyasî de rojnamegerî zî tede yê. La bi, taybetî zî rojnamegerê cinî hedef yenê girewtene. Cinîyê ke mîyanê şert û mercê xidar de xebityenê yenê destbendkerdene û yenê tepiştene. Ma eşkenê vajê ke teda û hêrişî hemverê têkoşînê cinîyan de yeno kerdene."

 

'Rojnamgerî suc nîya' 

 

Dîcleye dîyar kerd ke rojnamegerî suc nîya û veng da ke ganî Berîtane serbest bêra veradayene û vat: "Ma  çiqas hemverê nînan hêriş û tedayan xo bi rêxistin bikerê, ma eşkenê hende hêrişan veng vejê. Ma nimûneyê tewr peyîn yê Wanî de bi tepiştişê 4 rojnamegeran dî. Serê nê tepiştişan de reaksîyonê pîlî ameybî ramojnayîş û hetê komelî ra wayîrvejîyayîşêko pîl bi ca amebi û 4 embazê ma serbest ameybî veradayîş."

 

'Ganî Berîtane serbest bêra veradayene'

 

Muxabira Arti Tv Bahar Kiliçgedîk zî dîyar kerd ke Berîtane rojnameger a û vat: "Rojnamegere Berîtane her wext hemverê zîhnîyetê camêrdan têkoşîn dayîne. Cinîyê ke Amed de ameyî destbendkerdene bi taybetî cinîyê têkoşer ê. Bi nê destbendkerdişan de hetêke têkoşînê cinîyan hedef ameyo girewtene, hetêke bîn ra zî nê têkoşînê cinîyan kenê xebere, hedef ameyê girewtene. Destbendkerdişê Berîtane yeno manaya hedefgirewtişê xeberan. Ma reyke bîn dubare kenê ke ma şahîdê rojnamegerîya Berîtane yê. Rojnamegerî suc nîya û ganî Berîtane serbest bêra veradayene."

 

'Wazenê cinîyan bêveng bikerê' 

 

Muxabira ma Safîye Alagaş zî bale ant serê destbednkerdişê Berîtane û vat: "Berîtane, bi serran o rojnamegerîye kena. Tutêke qij ra bigîrê, heta polîsan û temamê Tirkîya zana ke Berîtane rojnameger a. Berîtane bi serran o ajansê cinîyan, semedê cinîyan têkoşîn keno. Berîtane xeylêk rey semedê xebatê xo yê rojnamegerîye ra ameya muhakemekerdene û hema zî yena muhakemekerdene. La reyna zî ma vanê, rojnameger suc nîya. Destbendkerdişê Berîtane semedê çimtersnayîşî yo. Bi no hawa wazenê ke cinîyan bêveng bikerê û vengê çapemenîya azade bibirnê."