ENQERE - Amed de mîyanê înan de muxabira ma Berîtan Canozer zî esta 22 cinî ameyî destbendkerdene. Cinîyan reaksîyon vera nê dayî û dîyar kerdî ke îqtîdar hemverê cinîyan şer dayo destpêkerdene û vatî: "Ma do zîhnîyetê înan îfşa bikerê û hemverê nê hêrişan têkoşînê xo girs bikerê."

 

Hetê Serdozgerîya Komare ya Amedî ra cipersayîş ame destpêkerdene û mîyanê înan de muxabira ajansê ma Berîtan Canozer zî esta, 22 cinî vizêr serê sibayî sereştişê keyeyande ameyî destbendkerdene. Reaksîyonê hemverê destbendkerdişan dewam kenê.

 

'Ma do zîhnîyetê înan îfşa bikerê'

 

Hemsereka HDPyî ya Sîncanî Fatma Kiliçarslan dîyar kerd ke prosesê serrê peyînan de têkoşînê cinîyan her wext operasyonê destbednkerdişan dir ameyo rî bi rî û vat: "Îqtîdar, bi taybet herême de verê xo dano cinîyê ke têkoşîn kenê. Sebebo tewr pîl ê hêrişan hemverê têkoşînê cinîyan o. Her  rey carê jin ji bo bertek nîşan bidin daketin kolanan. Em baş dizanin ku ji bo peşî li têkoşîna jinan bigirin van êrîşan pêk tînin. Wek her carê wê jin îro jî li dijî van êrîşan têkoşîna xwe mezin bikin. Aliyê rewa em in, em ji bo maf û jiyana xwe têdikoşin. Em dest ji vê têkoşînê bernadin. Em ê hem zîhniyeta wan îfşa bikin û hem jî têkoşîna xwe mezin bikin.”

 

'Bi tepiştişan nêeşkenê vernîya cinîyan bigîrê'

 

Hemsereka HDPyî Enqereyî Pakîze Sînemîlîoglu zî wina vat: "Ma nê tedayan bi şîdet şermezar kenê. Ganî wa embazê ma serbest bêrê veradayîş. Do reyke bîn bêro vînayene ke bi tedayan nêeşkenê vernîya têkoşînê cinîyan bigîrê. Ma do kîşta embazanê xo de bê. Wa bicîwîyo têkoşînê ma yê cinîyan."

 

'Cinîyan kelepçe vetî û vejîyayî meydanan'

 

Sereka Pêroyî ya Partîya Şorişgêr Elîf Torun Oneren zî wina vat: "Îqtîdar bi faşîzmî dir bîyo yew beden. 8ê Adare de îqtîdar kewt zehmetî. Cinîyan 8ê Adare de kelepçeyê elektronîk vetî û vejîyayî meydanan. Bi cesaretêko pîl hepsê keyeyî zor berdî. Pêkerdişê Stenbolî ame feshkerdene. Cinîyan meydanan de vengê xo bez kerdî. Ma bi sloganê, ‘cinî wareyê cinîyan ê' kewtî rayîran. Ma her wext verê cinîyanê ke rastê şîdetî ameyê de yê. Ma hewl da ma perspektîf û torê xo yê paştdayîşî hîra bikerê. Tehemulê ma yê cinîyan êdî nêmendo."

 

'Ma wazenê destkewtişê xo peyser bigîrê'

 

Elîfe tewr peyîn vat: "Ma wazenê ke destkewtişê xo peyser bigîrê. La ey wazenê ke destkewtişê ma çin bikerê. Wazenê cinîyan hepsê keyeyî bikerê. Bi taybetî hemverê cinîyanê kurdan hêriş zêde yo. La cinî her wext tewr xurtvejênê werte. Ayşe Gokkan 83 rey ameya destbednkerdene. La her rey tewr zêde xurt bî. Bi eynî hawa Leyla Guven zî xoverdayîşêko pîl ramojna. Eylem Aktaşlar ke hemverê DAIŞî xo ver da û bî bêmerg. Coka nê teda û hêrişî cinîyan nêpelçiqnenê."

 

Vervatoxa Cinîyan ê HDPyî ya Enqereyî Zeyno Bayramoglu zî reaksîyon vera destbendkerdişan da û vat: "Ganî cinîyê ke ameyê destbendkerdene, bêrê veradayene. Her cayê dinya de hêriş vera cinîyan de esto û cinî bi xoverdayîş û têkoşînê pîl game peyser nêerzenê. Ma têkoşînê embazanê xo silam kenê. Ma reyke bîn bale ancenê serê hêzê yewbîyaye yê têkoşînê cinîyan ê welatê ma û meydanê mîyanneteweyî.”