Medya Uren

 

MÊRDÎN - Songul Dogan HDPyije û Qedrîye Yilmaz DBPyije derheqê tecrîdê serê Rayberê PKKyî Abdullah Ocalan û çalakîyê grevê vêşanîye ke dewam kenê de wina vatî: "Tecrîdê serê tepişteyê sîyasîyan hemverê aştîye yo û eynî wextî de darbeyêke pîl ê hemverê demokrasîyî yo."

 

Tecrîdo girankerde yê serê Rayberê PKKyî Abdullah Ocalan de dewam keno. Hemverê tecrîd û binpaykerdişê heqan ê tepişteyê sîyasî 27ê teşrîna peyêne 2020 ra dest bi grevê vêşanîye yê bidor û bêdem kerdibî. Çalakî roja xo ya 132yîne de dewam kena.

 

Hemşaredara bajarokê Perî yê Mazgêrdî yê Dêrsimî ke vera ci qeyûm ame tayînkerdene Songul Dogan û hemsereka Partîya Herêmê Demokratîk (DBP) Qedrîye Yilmaz derheqê tecrîd û binpaykerdişê heqan de ajansê ma dir qisey kerd.

 

'Pêro şert û mercan de ma tîya yê'

 

Songule wina bale ant serê hêrişan û wina vat: "Ma hêriş û tehdîdan rê xerîb ê. Bi seserre yo nê hêrişî dewam kenê. Prosesê peyîn de zî tepiştiş, şîdet, qeyûm, îşkence, heta padayîşê partîyan û vistişê parlamenterîyê HDPyijan û bi serran o tecrîdo girankerde dewam keno. Hemverê tecrîd, tehdîd, tepiştiş û îşkenceyan tu wext sere nêtewêna. Ma qetî paşta xo nêda şarî. Ma kîşte şarê xo de yê. Pêro şert û mercan de. Yê ke wazenê bi nê rengî rêxistinê ma tafsîye bikerê, zaf şaş kenê."

 

'Ganî ma pîya vengê xo berz bikerê'

 

Songule tewr peyîn wina vat: "Tecrîdo girankerde yê serê pêro tepişteyan sucê merdimayî yo û çîyêko nîno tesdîqkerdene yo. Ma sey partîyêke sîyasî ke rastê hêrişî yenê zî ma do tecrîd tesdîq nêkerê û vindertişê xo hemverê nê ramojnê. Ganî pêro şar zî bi reaksîyon bo. Semedo ke tecrîd bêro şiknayîş û peynîya binpaykerdişê heqan bêro. Lazim o ma bi yew vengî vengê xo berz bikerê. Ma do sere nêtewênê û her wext wareyan de bê hemverê pêro nêheqîyan. Wa kes bê hêvî nêbo. Ma nînê tesfiyekerdene."

 

'Tecrîd sucê merdimayî yo'

 

Qedrîye, destpêk de bale ant serê tecrîdî û vat: "Bi serran o Birêz Abdullah Ocalan Girawa Îmraliyî de yeno tecrîdkerdene û no tecrîd çend serrê peyîn de resa sewîyeya tewr berz e. Bi serran o xebere ci ra nîna girewtene û têkilîyê ey yê teberî yenê birnayene. No binpaykerdişê heqan, sewîyeya tewr pîlî yê îşkenceyî yo. Tecrîd sucê merdimayî yo. Heta şima nê ferq bikerê ma do nê vatişî her wext biqîrê. Semedo ke rayîrê çareserî şiknayîşê tecrîdî ra derbaz beno."

 

'Serkewtişo tewr pîl bawerîye ya'

 

Qedrîye tewr peyîn wina vat: "Çend serrê peyîn de bi taybet zî prosesê janî sey bahaneyêke yeno vînayene û hêrişê erjê kurdan yeno kerdene. Wazenê xebatanê ma îlegalîze bikerê. Yan zî bi seyan û bi hezaran sîyasetmendarê ma zîndanan de yê. Îşkence, binpaykerdişê heqan û tecrîdê heme zîndanan de vila bîyê. Semedê nê tecrîd ra vajê nê, lazim o pîya veng vejê. Ganî ma nê ra bawer bikerê, ma do bieşkê serbikewê. Serkewtişo tewr pîl bawerî ya."