Gulîstan Azak

 

AMED - Amed de 4ê Sibate de camêrdo bi nameyê Aslan Karataş hewl dabi tutêke qetil bikero. Dayîka tute reaksîyon ramojna û vat, hîna Aslan Karataş nêameyo tepiştene û veng da hukmatî : "Amancê antişê Pêkerdişê Stenbolî çi yo gelo, tewr zêde kiştiş, tewr zêde bêdadî yo?”

 

Qezaya Bismilî ya Amedî de 4ê Sibate de camêrdo bi nameyê Aslan Karataş (34) bi serrêke teda tutêke rê kerdêne ke ci dir bizewicyo. Tute, rastê tehdîd û desteştişê gumanbarî ameye û tewr peyîn bi çekî bi giranî ameye birîndarkerdene. Tutêka ke Amed de nêweşxaneyêke de yena dermankerdene, tehlukeyê cuya aye esto. Pêwa nê hema zî Aslan Karataş nêameyo tepiştiş.

 

'Edalet ça de yo?'

 

Nûrcane wina vat: "Vanê ke eke biciwîya beno ke felç bimana. Bi di mengî yo Aslan Karataş nêameyo tepiştiş. Kênaya mi beşê giran de ya. Aslan zî teber de cuya xo dewam keno. Gelo edalet ça de yo? Dewlete ça de yo? Nêzdîbîyayîşê hemverê tutêke rastê hewldayîşê qetilkerdişî ameya, no yo gelo?"

 

‘Mi nêweşxane de eşnawit ke pêkerdiş ameyo wedaritene'

 

Nûrcane bale ant serê qerarê feshkerdişê Pêkerdişê Stenbolî û wina vat: "Kênaya mi bi merdişî dir têkoşîn kena. Gumanbar teber de geyreno. Ez verê berê nêweşxaneyî de ya. Ez nêweşxane de musaya ke pêkerdiş ameyo feshkerdene. Bawerîya mi bi edaletî nêmenda. Roje tewr tay 3 cinî yenê qetilkerdene. Bi desan zî rastî hewildayîşê qetilkerdişî yenê. Gumanbarî teber de gêrenê. Ez veng dana hukmatî; amancê şima çi yo gelo? Tewr zêde kiştişê cinîyan o? Tewr zêde bêdadî yo gelo? Çîyê ke kênaya mi cuyaya ez nêwazena tutê bînî biciwîyê. Gelo şima wazenê cinî tewr bêrê qetilkerdene. Amancê şima çi yo? Ez sey cinîyêke, sey dayîkêke hemverê nê ya. Ez nêwazena pêkerdiş bêro wedaritene. Semedê cinîyan ciwîyayîş û edaletî wazena."

 

'Semedê cigêrayîşê min ê edlaletî bibê veng'

 

Nûrcane tewr peyîn qiseykerdişê xo de vengdayîşê paştdayîşê heme cinîyan kerd û wina vat: "Ez wazena ke ma hemverê nê bêdadî de bêrê têhet. Ez wazena ke şima zî cigêrayîşê min ê edaletî de bibê veng."