RIHA - Mustafa Amutgan 28 serrî yo tepişte yo, cinîya Mustafa, Remzîye bale ant serê rewşa tepişteyan û vat: "Êdî bes o, sere wedarnê. Bi ters ma nêeşkenê çîyêk bidest bikerê. Ma do bi cesaret serbikewê."

 

Tepişteyê PKKyî û PAJKî bi amancê ke tecrîdo giran yê serê Rayberê PKKyî Abdullah Ocalan bêro wedaritene û peynîya binpaykerdişê heqê tepişteyan kewtibî grevê vêşanîye yê bêdem û bidor. Grev bi 131 rojî yo dewam keno.

 

Nînan ra yew zî Mustafa Amutgano ke zîndanê Tîpê T yê Hîlwanî de tepişte yo. Mustafa Amutgan 28 serrî yo tepişte yo û prosesê cîya de tewrê grevê vêşanîye bîyo. Cinîya Mustafayî, Remzîye Amutgan, derheqê binpaykerdişê heqan yê zîndanan de ercnayîş kerd.

 

'Ez nêeşkena nê qebul bikera'

 

Remzîye dîyar kerd ke mêrdeyê aye 28 serrî yo tepişte yo, nika zîndanê Tîpa T yê Hîlwanî şertê xirab de yeno tepiştiş û vat: "Mêrdeyê mi tepişteyê sîyasî yo. Lajê mi zî dosyayêke edlî ra tepişte yo. Ez wexto ke şina pêvînayîş wazena ke herdiyan eynî roje bivînî. Îmkanê mi çin ê ez hewte ra di rey şêra. Problemê min ê weşîye estê. Mi pêşnîyaz berd îdareyê zîndanî rê. Mi vat, wa mi eynî saete de bikerê zere. La îdareyî nê red kerd. Dima ra vatî, mêrdeyê to gerek şêro mîyanê edlîyan. La ma zanê no bêhuqûqî yo. Semedê mêrdeyê mi pêşnîyaz kenê ke şêrê mîyanê edlîyan. La ez nê qetî qebul nêkena.

 

'Xo ra esîr ê'

 

Remzîye dîyar kerd ke tewr peyîn zîndan de bi heqeretê gardîyanan sey, "bicehme, şore tîya ra" ameya û vat: "Mi waşt ez lajê xo û mêrdeyê xo bivînê. La îdareyî pandemî kerd bahane. Ez şîya verê wezîfedarêke bîn. Bi di serrî yo mudurêke newe ameyo zîndan, semedê tepişteyan tu çîyêk nêkerdo. Her reya ke ma şinê zîndan, gardîyanî heqeret ma rê kenê. Ez a rojan şîya zîndan uca de ez serê hişê xo ra şîya. Gelo çira hende zulm? Xora ê esîr ê, waştişê înan bi ca nêanê. Mêrdeyê mi wezaret rê waştişname nuşt. La gardîyanan waştişname nêerşawito. Vatî ke vinî kerdê. No senî zîndano, wa yew mi ra vajo."

 

‘Êdî tehemûlê mi nêmendo'

 

Remzîye tewr peyîn wina vat: "Ma derdê xo kamî ra vajê gelo? Ma şêrê kam ca zî ma dest veng gêrenê. Eke rayîrêko bîn nêdê vernîya mi, ez o xo biveşnî. Êdî bes o. Tepişteyî grev de yê. Kes kesî nêeşkeno pers bikero. Bi çend mengî, gelo qet wijdan û merhemet çin o. Êdî bes o, sere wedarnê. Bikewê kuçeyan qisey bikerê. Ters ra çîyêk nêvejêno. Ma do bi cesaret serbikewê. Çira sereyê ma tewênaye bo. Ma serberz ê. Eke ma nêbê yew, ma do şêrê yew bi yew. Êdî tehemulê mi nêmendo. Wexto ke ez şina zîndan, ez zî nêwazena uca ra bêra. Ka vajê vera nê zulmî se bikera."