Safiye Alagaş

 

AMED -Tepişteya nêweşe Şîvekare, derheqê pêvînayîşê telefonî ya 4 deqeyan ke Mehmet Ocalan bi Rayberê PKKyî Abdullah Ocalanî dir kerd û dima ra ame visnayîş de, ercnayîş kerd û vat: "Êdî ma tepişteyî nêkewenê pêvînayîşan û pêvînayîşê telefonan zî. Sewbîna do grevê vêşanîye zî dewam bikerê."

 

Rayberê PKKyî Abdullah Ocalan 22 serrî yo binê tecrîdê giran de yeno tepiştiş. Zîndanan de bi waştişê ke tecrîd bêro wedaritene û binpaykerdişê heqê tepişteyan peynî bibê, tepişteyî 27ê teşrîna peyêne de kewtî gervê vêşanîye ya bêdem û bidor. Grevê vêşanîye 129 rojî yo dewam keno. Tepişteya bi nameyê Şîvekar Ataş ke nêweşa qelbî ya û 5 serrî yo zîndanê cinîyan ê Bakirkoyî de manena, reaksîyon vera birnayîşê pêvînayîşî da.

 

Şîvekare, pêvînayîşê telefonî ya bi dayîka Rabîa Ataş dir kerd de derheqê tecrîdî û birnayîşê telefonî ya bi Abdullah Ocalanî dir ercna. Dayîka Şîvekar Rabîay dîyar kerd ke kênaya aye vata ke êdî nêvejênê pêvînayîşê telefonî û vatişê Şîvekare wina neql kerd: "Bi Rayberîyê ma dir pêvînayîşêke telefonî bi. Dimayê 4 deqeyan telefon ame padayîş. Ma nê qebûl nêkenê. Ma bi nê nêvindenê. Ma çalakîya xo peynî nêkenê, çi beno wa bibo ma grevê xo dewam kenê. Yan o zî heqanê xo ra feyde yan zî ma do çalakîya xo dewam bikerê. Ganî heqê qanûnî ra feyde bigîro. Lazim bikero ma do nêvejê pêvînayîşan. Ma keyeyê xo nêgeyrenê. Nêzdîbîyayîşê hemverê rayberê ma, hemverê ma yo. Ma nê nêzdîbîyayîşê hemverêê ey qebul nêkenê. Wa her kes wina bizano."

 

'Wa bi keye û avûkatan dir pêvînayîş bêro kerdene'

 

Rabîa zî dîyar kerd ke birnayîşê telefonî ya bi Abdullah Ocalanî dir şaş o û vat: “Bi mîlyonan kesî zanayîşêke pawenê. Derheqê asayîş û weşîya ey de endîşe estê. Pêro tepişteyî semedê nê kewtê grev. Eke zanayîşêke nêro girewtene, do tutê ma bikewê rojeyê mergî. Ma nêwazenê cenazeyî vejîyê. Wa Birêz Ocalan heqê xo ra feyde bigîro. Ne keye û ne zî avûkatî eşkenê şêrê. Ma veng danê wezaretê dade. Ma veng danê partîyanê sîyasîyan. Ma veng danê kesê ke wayîrê wijdanî yê. Wa semedê çareserî gamêke bierzê. Wa keye û avûkatan dir pêvînayîş bikerê. No heqo tewr xozayî yo"

 

'Ma dayîkî nêeşkenê bêveng bimanê'

 

Rabîa qiseykerdişê xo wina dewam kerd: "Ganî êdî peynîya nê bîyarê. Ma zanayîşêke Ocalanî ra nêgîrê do rewşe hîna xirab bo. Wexto ke zanayîş gênê ma rehetîye ci ciwîyenê. Ma fikr û ewnîyayîşê ey esas gênê. Cuya hîna weş bena. Belkî aştî zî bêra. Belkî tutê ma zîndanan ra vejîyê. Heta tecrîd dewam bikero, do rewşe zî xirab bo. Wa cenazeyî zindanan ra nêvejîyê. Wa keyeyî bêveng nêmanê. Çalakîya verê de çend kesî merdî. Gunayê înan milê înan de yo. Yê ke bêveng ê, hemkarê nê sucî yê. Wa destê xo bidê serê wijdanê xo. Ma pêro nê welatî de êsîrê. Ganî wina derbaz nêbo. Ganî pêvînayîş bi Birêz Ocalanî dir bêro kerdene. Wa tutê ma nêkewê rojeyê mergî. Ma dayîk ê, ma nêeşkenê bêveng bêmanê. Kezeba ma parçe bena. Wa her kes destê xo bido serê wijdanê xo."