Medya Uren

 

MÊRDÎN - Adîle Zengîna ke 4 serrî zêdeyêr o dewe de cuyêka newe awan kerda, bi bahaneyê ke awanîya înan dûrî rayîrî ya hetê Şaredarîya Şaristanê Girdî ya Mêrdînî bê awe yena verdayene. Adîle vana ke tay merdimî terkê şaristanî kenê û yenê heywanan wey kenê, sewbîna ramitiş kenê labelê yê ke yenê zî paştdayîş semedê nê nîno kerdene.

 

Adîle Zengîn û mêrdeyê xo dimayê ke demêk derg şaristan ra agêrayî dewe û dewe de waştî ke ramitiş bikerê û heywanan awan bikerê. Adîle û mêrdeyê xo her karê xo kenê. La hetê Şaredarîya Şaristanê Gird ya Mêrdînî ra bê awe yenê verdayîş. Heywanê înan bê awe manenê. Semedê bêawebîyayîşî zergûnayî zî wişk bena. Ma Adîle Zengîn goşdarî bikerê ka pêwa desan muracatan senîn bê awe manenê.

 

Bi serran o bê awe yê

 

Adîle Zengîn (50) verê ke dewa xo rê bi ca bibo, xeylêk metropolan de ciwîyena. Bi taybetî zî semedê tedayê dewlete koçberê Ewropa kenê. Dimayê emrêke ra dima, wazenê serê herra xo de biciwîyê. Goreyê nê 3 donim erd gênê, keyeyêk qij, cayê weykerdişê heywanan û cayêk semedê ramitişî ameyo visnayîş, viraştî. Xêrcê problemê awe her çî bi zerîya înan bi. Bi rojan, bi mengan û serran waştişê awe kenê. Şaredarî înan erşawena Mudurîyetê Pêroyî ya Îdareyê Qenalîsazyonî û Awe ya Şaredarîya Şaristanî Girdî ya Mêrdînî (MARSU), MARSU zî înan erşaweno şaredarî. Serrê înan wina derbaz benê.

 

Semedê pesdewarî û ramitişî awe çîya tewr girîng a. Bêawî semedê Adîle û mêrdeyê aye beno sebebê problemê pîlî. Bi serran heywanê înan semedê kêmawî telef benê û zergûnayî înan wişk beno. Xeylêk tewirê ramitişî semedê bêawî ra wişk benê. Adîle û mêrdeyê xo ameyê a rewşe ke heywananê xo biroşê. Bi serran o hewarê înan semedê hetkarîye bê cewab maneno.

 

'Mi qet netîce nêgirewt'

 

Adîle wina vat: "Tu ca nêbeno warê merdimî. Ez û mêrdeyê xo zî ma Qoser de yê. Ma waşt ke semedê cuyêka serê herra xo de ma derbaz bikerê. Bê guman mesrefê ma zaf virazya la heta uca zî her çî normal bi. Heta ke ma problemê awe cuyayî. Zergûnayî ma wişk beno. Ma semedê awe rica kerd, ma waştiş kerd, ma xo hêrs kerd û ma awe waşt. La bi tu hawayî netîce nêgirewt."

 

'Ma ameyî mexdûrkerdene'

 

Adîle dîyar kerd ke awe heta camî şina la camî çend gaman înan ra dûrî ya awe înan çin a û vat: "Keyeyê ma çend gamî camî ra dûrî yo, awe heta camî yena la nêresena ma. MARSU bi şaredarîyê şaristanê girdî ya Mêrdînî dir xebityeno. La her wexto ke ma muracat kenê o ma cayêk bîn rê erşaweno. Goş zî nêdanê ma. La tîya keyeyêk yeno mexdûrkerdene. Heywan û zergûnayî zirar vînenê."

 

'Heta nika ma tu xizmet nêdî'

 

Adîle tewr peyîn wina vat: "Ma tena cuyêka xozayî waşt la destûr nêdanê nê çî. Ma hetkarî nêwazenê. No wezîfeyê înan o û ganî bikerê. Sebebê ke ma nêvînenê çîyo gelo? Xizmetê ke şaredarî welatijan rê keno çin o. Heta nika ma xizmetêke zî nêdîyo. Her wext oyo ke zirar danê ê yê."