Safiye Alagaş

 

RIHA - 12 serrî serê qetilkerdişê Mustafa Dag û Mahsum Karaoglano pîrozkerdişê 4ê Nîsane de ameyî qetilkerdene dir derbaz bi. Dayîkê Mahsum û Mustafa vengdayîşê caardişê edaletî kerdî û vatî: "Ganî bêro zanayîş ke ma tu wext fek cigêrayîşê xo yê edaletî ra vera nêdanê û m awazenê ke kiştoxê bêrê muhakemekerdene û ma do her wext pey dewaya tutanê xo bê."

 

Kurdî serra 2004ine ra heta nika 17 serrî yo semedê 4ê Nîsane roja Rojbîyayîşê Rayberê PKKyî Abdullah Ocalan pîroz bikerê û bi sloganê, "Azadîya Rojî" verê xo danê Amara û "Raywanîya Rojî" kenê. Reyna 4ê Nîsane 2009ine de semedê rojbîyayîşê Rayberê PKKyî Abdullah Ocalanî bi deshezaran kesî verê xo dayî dewa Amara ya qezaya Xelfetê Rihayî, la rastî astengîyê leşker û polîsan ameyî. Nê ser o serebûtî vejîyayî û 12 serrî serê serebûtî ra derbaz bi. Merdimê ke bi wesayîtê xo vejîyayî û waştî mîyanê zîyan û hêgan ra şêrê dewe, polîsan hêrişê înan kerd û hêrişan de 60 kesî birîndar bî.

 

Mustafa Dag û Mahsum Karaoglan netîceyê hêrişan de dinyaya xo bedilnayî. Derheqê kiştişê înan de Dozgerê Komare ya Bêrecûkî cipersayîş da destpêkerdiş, la heta ewro cipersayîş de tu averşîyayîş nêvirazya. Dayîkê Mahsum û Mustafa hêvî kenê ke rojêke edalet bi ca bêro û kiştoxê Mahsûn û Mustafa bêrê muhakemekerdene.

 

'Ganî yê ke lajê mi qetil kerdî biameyîne cezakerdene'

 

Dayîka Mahsumî, Sultan Karaoglan dîyar kerd ke bi 12 serrî yo edalet bi ca nêameyo û vat: "Lajê mi unîversîte wendêne û beşê xo yê matematîkî de zaf serkewte bi. Wexto ke Mahsun bi embazanê xo dir şîne dewa Amarayî, bi hêrişê polîsan dir rî bi rî ma. Netîce de lajê mi ame qetilkerdene. Derheqê serebûtî de ne cipersayîş ame destpêkerdene ne zî yê ke ey kişt ameyî cezakerdene. Yanî nêame zanayîş ke kamî lajê mi qetil kerd. Semedo ke cipersayîş bêro destpêkerdene ma xeylêk rey muracatê dozgerî kerd la her wext muracatê ma bêcewab mendî. Ganî yê ke lajê mi qetil kerdî biameyîne cezakerdene. Lajê mi çîyêk nêkerdibi, bêsûc bi la bî sebebê kiştişê lajê mi."

 

'12 serrî yo dejê mi ra çîyêk kêm nêbi'

 

Sultane ard ziwan ke dejê aye hema zî newe yo û vat: "Seke serê merdişê ey ra 12 serrî derbaz nêbîyo hîs kena. Ez hema zî eynî roje ciwîyena, kezeba mi veşana. No dej semedê mi zaf giran o. Wina giran o ke êdî nêeşkena wedarî. Qene sucdarî bi ameyîne cezakerdene, hîn wijdanê mi do rehet bîne. Çi heqê înan estbi ke ey qetil bikerê. Dewlete sey Mahsûmî mi xeylêk ciwanan qetil kerd. Hema zî qetil kena, gêna, û îşkence bi înan kena. Do heta key wina dewam bikero. Ma teda û zordarîya dewlete qebul nêkenê. Tutê ma nê zulmî heq nêkenê. Ma wazenê tutê ma serê nê welatî de bi hawayêke azad biciwîyê."

 

'Mahsum girêdayê têkoşînê azadîya kurdî bi'

 

Sultane dewam de wina vat: "Mahsum lajê min o tewr qij bi. Pêro kesan ey ra zaf hes kerdêne. Têkilîyê ey bi merdiman dir zaf baş bi. Semedê keyeyî zaf hîsgêr bi û zaf qîmet dayîne keyeyê xo. Ma pêrûne ey ra zaf hes kerdêne. Reyan vana gelo qey ma zêde ci ra hes kerdêne ke hende leze mîyanê ma ra şi. Wexto ke tut bi, zaf jîyatî bi. Hem şîne mektebe hem zî xebityayîne.

 

Sultan wina qiseykerdişê xo qedêna: "Ma wazenê serekê ma azad bo. Wa avûkat û keyeyê xo bivîno. Dinya de edalet û huqûqêke bi no hawa çin o. 22 serrî yo binê tecrîdî de yo. Wa no tecrîd werte ra wedarnê."

 

'Zerrîya Mistafayî de eşqê azadîye veng da'

 

Dayîka Mustafa Dag, Naîme Dag zî dîyar kerd ke dewlete xêrcê zulmî çîyêk bîn nêdayo înan û vat: "Lajê mi zewicnaye bi, 2 tutê ey pey ci de mendî. Zerrîya Mistefayî de eşqê azadîye veng da. Her wext semedo ke no zulm serê ma de wirzo, mîyanê hewldayîşêk de bi. La lajê mi rayîrê Amarayî de ame qetilkerdene. Bîlasebeb lajê mi kiştî. Bi kiştiş çiç kewt destê înan? Xêrcê bermayîşê dayîkan. Kezeba mi veşnayî. Ez êdî zaf bîya rincan. Mi dej ant wa tu dayîkêke dej nêanco."

 

Naîme dîyar kerd ke aye 12 serrî yo nêeşkena bi zerrîyêka rehet sereyê xo bido serê başna vat: "Ma çîyê asan nêciwîyayî û hema zî kiştoxê lajê mi nêameyî cezakerdene û teber de geyrenê. Tornê mi bê pî mendî. Mi waştêne Mustafa pîlbîyayîşê tutanê xo bivînayîne. Mabêne Mustafa û embazanê ey zaf baş bî coka ez vana wa sereyê heme embazanê ey sax bo."