Gulîstan Azak

 

AMED - Şaredarîya Şaristanê Gird ya  Amedî semedê vurnayîşê komî, ‘planê Mastrî Vurnayîşî’ revîze kerd û sîstemê rîngî ame rojeve. Welatijan reaksîyon vera nê da û vatî, “Ezîyet, îşkence û rezîltî yo.”

 

Munîr Karaoglu ke sey qeyûm tayînê vera hemşaredarê şaristanê Pîl yê Amedî yê Partîya Demokratîke ya Şaran (HDP) Hulya Alokmen Uyanik û Selçûk Mizrakli ame ekrdene, bi îcratê xo şaristanî, rayîr ver bi mexduriyetan akerd û semedê nê rastê eraksîyonê şarî yeno.

 

Yew îcratê şaredarî ke rayîrê reaksîyonan akerd, sîstemê komî yê şaristanî yo. Roniştoxê Amedî, dimayê revîzekerdişê ‘Planê Master Vurnayîşî’ ê vurnayîşê komî de, semedê sîstemê rîngî ke ameyo rojeve, vurnayîş de zehmetîyan ancenê. Welatijê ke TOKÎyê Uçkuyular yê Kayapinarî û Memursenê yê Yenîşehîrê Amedî semedê wesayîtê vurnayîşêkomî ra feyde bigîrê, bi rîngan benê dinganê Nexweşxaneyê Cigêrayîşî yê Gazî Yaşargîl. Welatijê ke TOKÎyan ra bi rîng yenê komkerdene, dinganê nêweşxaneyî de wesayîtan espar benê.

 

'No ezîyet û rezîlî yo' 

 

Fatma Ateş sîstemê rîngî sey ‘ezîyet’ bi name kerd û wina vat: "Ez Çolguzelî ra her roj yena Ofîse. Ez mecbûr a her roje bêra Ofîse. Ez semedê lazimîyê weşîye mecbûra bêra. La ameyîş û şîyayîş de probleman ciwîyena. Wesayîtî dingan de nêvindenê. Bi saetan bende manena. Tutê mi astengdar keye de yo. Heta xo resnena keye ezîyetêko pîl ancena. Nê varanî de ma zehmetîyê pîl ancenê. No zehmetîyo yewin nîyo. Cinî her wext her wext rastê heqeretê şoforan yenê. Rojê vîyarte de şoforêkê hêrişê cinîyêke kerd. Nê çîyêke yenê ciwîyayîş bêterbiyetîyo."

 

'Vanê pandemî esto la'

 

Ayşe Kaya zî dîyar kerd ke sîstemê vurnayîşî qaşo şaristanê bînan ra nimune girewtê û vat: "Nê vurnayîşî do bibê sebebê mexdurîyetan. Kesê ke TOKÎyê Uçkuyu de ciwîyenê, bi otobusêke kom kenê. Dingê nêweşxaneyê cigêrayîşî de danê ro û kenê otobusê bînan. Gelo vera ke reyke wesayîtan espar bibê, çira di rey. Sewbîna dinge bena pir û wesayîtî çin ê. Ez mexduriyetêke cidî ciwîyena. Ez û hîrê tutê xo na varane de perîşan bî. No problem pîl o. Vanê pandemî esto la... Dingan de her kes keweno rêze."

 

'Do problemê pîl vejîyê werte'

 

Zehra Çevîk zî derheqê babete de wina vat: "Pêwa pandemî ma anê verê nêweşxane. No rîskêko pîl o. Do problemê pîlan vejo werte. Nêweşxane de nêweşê covîd estê. Welatijan anê uca û vindarnenê. No zî rîskê vilabîyayîşê nêweşîye zêde keno.