WAN - Kesrewane (puşîya hewtreng) seserre yo ke dayîkan ra derbasê neslê neweyan bîya û heta ewro ameya. Kesrewane bi keda cinîyan heta nê rojan ameya.

 

Cil û belgê adetî yê cinîyê kurdan her wext bi xemlê xo bîyaye bîyê û yew xemla ke cil û belgan temam kena Kesrewane yanî pûşîya hewt reng a. Layê ke ci ra vanê armuş, Herêma Federal a Kurdistanî ra anê û viraştişê Kesrewane de xebitnenê.

 

Cinîyê dewe bi roj karê keyeyî kenê, bi şewe zî binê roşnê çila de kesrewane xo neqş kenê. Kesrewane parçeya tewr bi erj a. Bi keda destê cinîyan nesl bi nesl heta ewro ameya.

 

Kesrewane parçeyê tewr bi erj yê cil û belgan a

 

Zulfîye Ertaş serra 90an de semedê polîtîkayê dewlete koçê taxa Karşîyaka ya Îpekyolî ya Wanî kerda, kesrewana destê aye de se serre derbaz kerda. Kesrewana ke dayîka aye ra menda, aye zî kênaya xo ra nimita. Zulfîye dîyar kerd ke şarê Kurdî bi kulturê xo cîya yê û vat, kesrewan verê yew parçeyê girîng yê kiras û fistanan bîya.

 

Nesl bi nesl ameya heta ewro

 

Zulfîye vat, kesrewane bi kedêka kolektîf ameyîne mûnayîş û destê xeylêk cinîyê ciwanan gênayo piro. Zulfîye wina vat: "Emrê kesrewana destê mi de tewr tay 100 serre esto. Kesrewana dayîka mi bî û dîyarîye mi kerd. Dayîka mi 80 serrî bî. Mi zî kesrewane dîyarî kênaya xo kerd. Ez wayîrê mîrasê dayîka xo vejîyaya û mi ard heta nê rojan."

 

Zulfîye qiseykerdişê xo wina qedêna: "Veyve bi kesrewanan ardêne. 7 rojan a kesrewane serê înan de mendêne. Wina ameyîne manaya qebûlkerdişê endama newe ya keyeyî. Peynîya 7 rojan de veyve sey endamêke newe tewrê keyeyî bîne. La çi heyf, cinî sey verê wayîrê kulturê xo nêvejênê."