RIHA - Merdima tepişteya Dîlan Aktaş, çalakgerê ke zîndan de grevê vêşanîye dewam kenê, pîroz kerd û vat: "Ganî waştişê tepişteyan bi ca bîyarê û peynîya grevê vêşanîye bîyarê."

 

Tepiştiyê PKKyî û PAJKî bi amancê ke tecrîdo giran ya serê Rayberê PKKyî Abdullah Ocalan protesto bikerê û peynîya binpaykerdişê heqê tepişteyan bîyarê 27ê teşrîna peyêne de dest bi grevê vêşanîye ya bêdem-bidor kerdî. 25ê adare de, Serdozgerîya Komare ya Rihayî vengdayî birayê Abdullah Ocalan, Mehmet Ocalanî. Mehmet Ocalan bi birayê xo dir pêvînayîşê telefonî kerd. La pêvînayîşê bi telefonî dir dimayê demêke kilm ame birnayene.

 

Pêwa nînan, zîndanê herême û Tirkîya de tedayê serê tepişteyan dewam kenê. Mustafa Aktaş zî zîndanê Tîpê T yê Hîlwanî de maneno. Kênaya ey Dîlan Aktaş vengdayîşê peynîkerdişê binpaykerdişê heqê tepişteyan kerd.

 

Dîlane dîyar kerd ke pîyê aye 2 serrî û nîm tepişte yo û wina vat: "Ma semedê vîrusî bi endîşeyîn ê la hukmat semedê nê tu game nêeşto. Xeylê tepişteyî bi korona kewtî. La îdarekarê zîndanî û hukmatî tu eşkerayîyêke nêda. Ma bi îmkananê xo hewl danê ke nê prosesî derbaz bikerê. La hukmat tu çîyêk nêvano. Verpayê ci ma kerd mîyanê endîşeyan. Ma tepişteyê ke grev de yê pîroz kenê. Ê rumeta ma yê. Ma bi înan serberz ê. Têkoşînê înan ma serê lingan de gêno."

 

'Wexto ke ma tepişteyan vînenê probleman xo vîr ra kenê'

 

Dîlane bale ant serê probleman û vat: "Bi taybetî babeta cil û belgan de metodê bi şîdet estê. Pêvînayîşê peyîn de semedo ke gocake şale mi asin bî, problem vetî. Vatî gerek ti şale xo vejê, mi zî vat nê. La ez mecbûr menda ke şale xo vejî. Ez bi taybet şîya pêvînayîş. Rewşêka şerm a la hetê mi ra ney, hetê zîndanî ra. şerm o. Pêwa pêro probleman wexto ke ma tepişteyan vînenê ma kenê xo vîr ra. Semedo ke ê moral û hêzêko pîl danê ma. Nimûne pîyê mi wendiş û nuştiş zîndan de embazanê xo ra musa û no zaf girîng o."

 

'Ganî waştişê înan bi ca bîyarê'

 

Dîlane vat prosesê gervî de pîyê ci zaf kîlo dayo û vat: "Nê prosesî de semedê têkilîyê tepişteyan û keyeyan yewbînan rê bivisnê heme çî kenê. Sebebê problemê ke yenê ciwîyene, tedayê dewlete serê tepişteyan o. Ma êdî nêzanê se vajê. Ez veng dana hukmatî ke ganî waştişan bi ca bîyaro û grev peynî bê. Ma krîzê ke yenê ciwîyayîş nêzdî ra vînenê û ma ameyê nûqtaya peyîn."