Medya Uren

 

MÊRDÎN - Aynûr Aşan ke bi nêweşîya kanserî kewta û mêrdeyê aye Zîndanê Amedî de yeno tepiştene zî tedawîya dîalîzî vîneno û rewşa ey tehluke de ya, vengdayîşê bicaardişê edaletî kerd û vat: "5 tutê mi estê. Mêrdeyê mi zîndan de nêweş o, ez zî tîya de nêweş a. Gelo ma do senî xo wey bikerê? Ganî rewşa ma û tutan verê çiman de bêro girewtene û Hesen bêro veradayene."

 

Tepişteyo sîyasî Hesen Aşan ke 50 serrî yo û tedawîya dîalîzî vîneno, her ke şino rewşa ey giran bena. Eynî wextî de cinîya tepişteyo nêweş Hesenî, Aynûr Aşan zî bi kanserê cicikan kewta. Aynûra ke derheqê rewşa Hesen Aşanî de qisey kerde û vat, Hesen bi serrêke yo hucreyê yew kesî de yeno tepiştene û vat, cayê tepişteyê nêweşan zîndan nîyo.

 

Hesen Aşan (50) verê 7 serrî bi sebebê beşdarê çalakîya rayrayîşî bîyo, ame tepiştiş û 15 serrî ceza ci rê ame birnayene. Hesen, pîyê 5 tutan o û pêwa nêweşîyanê xo zîndan de yeno tepiştene. Cinîya Hesenî, Aynûr Aşan zî bi nêweşîya kanserê memikan kewta. Herdi zî hemverê nêweşîye, îşkence û ekonomî têkoşîn kenê. Hewl danê ke tutanê xo pêwa şert û mercê giranî pîl bikerê.

 

Semedê tewrbîyayîşê rayrayîşî 15 serrî ceza

 

Aynûre destpêkê qiseykerdişê xo de hedîse wina qal kerd: "Mêrdeyê mi bi hawayêke bê huqûqî ame tepiştiş. Tewrbîyayîşê çalakîya rayrayîşî de çi esto ma nêzanê. Tewrbîyayîşê rayrayîşî suc nîyo. Bi tu hawa ne nêweşîya ey ne zî rewşa tutanê verê çiman de nêame girewtiş. Demêke derg zîndanê Mêrdînî de mendêne. Verê 2 serran semedo ke rewşa ey yê weşîye giran bi zî berdî nêweşxaneyê Amedî. A roje ra heta nika nêardî."

 

'Serrêke yo yeno tecrîdkerdene'

 

Aynûre dewam de wina vat: "Her ke şino rewşa ey xirab bena. Bi serrêke gama ke benê nêweşxane bi bahaneyê karantîna yeno tecrîdkerdene. Wextê koronoyî de bi hezaran tepişteyê edlî yê ke tecawuz û qetil kerdê ameyî veradayîş. La Hesen û yê sey Hesenî semedê fikrê xo ameyê tepiştiş serbest nêameyî veradayîş. Nika tecrîd de yo û semedê nê her ke şino rewşa ey xirab bena. Vera karantîna eşkenê Hesenî serbest vera bidê."

 

'Ê bi hawayêke baş tedawî nêbenê'

 

Aynûre wina dewam kerd: "Mêrdeyê mi semedê nêweşîya ke ci dir estê ganî tedawî bibo. La zîndan nê îmkanî nêdano înan. Ê bi hawayêke baş tedawîya xo nêbenê. Her het ra şert û mercê cuya înan giran a. Ma nêeşkayî ci rê çîyêk bierşawê. Ey zî nêeşkayîne pereyê ceyranî bido ke 3 mengan bê ceyran mend. Nêwaşto ma ra vajo. Nika o zî, ma zî yenê mexdûrkerdene. Verê nika çend rojan tutê mi şî pêvînayîşê pîyê xo û vatî, o bi kursîya tekel ardî verê telefonî. Êdî rewşa ey eşkera ya."

 

'Cayê nêweşan zîndan nîyo'

 

Aynûre tewr peyîn wina vat: "Tuta min a qije bi hesretê pîyê xo pîl bî. Wexto ke bi telefon pîyê xo dir qisey kena û vana, 'her şefeq mi bigeyre' no ma dejneno. Benê sebeb ke tutê ma bi nê trajedî pîl bibê. Ganî rewşa keye û rewşa ey ya weşîye verê çiman de bêro girewtene. Lazim o tecrîdê serê înan bêro şikinayîş. Bi desan embazê sey ey estê. Me çend rey waştişname nuşt û erşawit la o zî ame peygoşkerdene."