WAN - Maşallah Ertaş ke cinîyêka krîzê ekonomîye ra tewr zêde betalî ra tesîr bîya, berardişê keda destê xo û berardişê xozayî roşena û debara xo kena. Maşallahe dîyar kerd ke qezencê înan qîm nêkeno la mecbûrî nê karî bikerê.

 

Krîzê ekonomîye Tirkîya de her ke şino zêde beno. Herême de zî yewin çime debara pesdewarî ya la semedê polîtîkayê şaş yê dewlete no zî ameyo sewîyeya çinbîyayîşî. Heto bîn ra zî yew çimeyê debare berê sînorî zî pandemî ra ameyî padayîş. Xeylêk esnafî semedê nê dikanê xo padayî. Bêguman yê ke tewr zêde nê prosesî ra tesîr bî, cinî bî. Cinî semedê debara xo bikerê beşêko pîl yê roje serê lingan de bê asayîşî derbaz kenê û hewl danê wareyê îstîhdamî de ca bigîrê.

 

Cinîya bi nameyê Maşallah Ertaş taxa Karşiyaka ya Îpekyolu ya Wanî de ciwîyena û semedo ke kar nêdîya, bi waya xo dir çîyanê bi destan virznena û roşena. Maşallahe hacetê ke bio destan viraznena bi pereyêke kêm roşena û tena semedê çanteyêke aşmêke şew û roje xebitêna. Maşallahe dîyar kerd ke nê çanteyî bi 150 TL yê zî nînê rotiş û wina vat: "Çimeyêke mi ya bîn bibayîne, mi nê karî nêkerdêne. Semedo ke keda ma bi rastî vera heqdestê xo nêgîna."

 

Maşallahe dîyar kerd ke bi ameyîş wisarî dir bi waya xo dir şinê dewa Walto ya Colemêrgî û bi ameyîşê zimistanî dir zî agêrenê Wan. Maşallahe wina vat: "Ma dewe de pincar arêdanê, sebzeyan wişk kenê, ma hingêmîn, goze û tirşike kom kenê û anê roşenê. Wisar de zî ma qilê koyan ra pincar arêdanê. Ma pelê mehşêlan arêdanê. Gorey waştişî ma roşenê zî. Pêro xidayê ma xozayî yê,"

 

Maşallahe dewam de dîyar kerd semedo ke hewceyê kesî nêbê nê karî kenê  vat: "Waya mi maxezeyêke de karêke dîbî. Menga hezar TL girewtêne. Seranserê roje de serê lingan de bî. Mi ci ra vat bi ma nê karî bikerê. Hewceyê kesî mebe. Ma şalî viraştî. Ma pê nê debara xo kerd. La çi heyf, beradişê destan qet hemverê xo nêgîno. La reyna zî ma mecbûrê bikerê. Ma nêwazenê hewceyê kesî bibê."