Şehrîban Aslan

 

AMED - Serra vîyarte de tuto bi nameyê Muhammed Velî Duzmezo 9 serre Çinar de amebi qetilkerdene û semedê 3 gumanbarê hedîseye tahlîye ame dayîne.

 

Tuto bi nameyê Muhammed Velî Dumezo 9 serre taxa Sergelya ya Çinarê Amedî de 21ê Çele de vinî bibi. Muhammed, keyeyêko xerabe de bi giranî birîndar amebi vînayene û nêweşxane de dinyaya xo bedilnabi. Derheqê qetilkerdişê Muhammedî de 6 merdimê ey ameyî tepiştene û dima ra serbest ameyî veradayene. Çarçeweya cipersayîşî de ema tutî Husnugul Taş, lajê ema ey E.T û O.F.T, B.T, S.O û xalê tutî Veysî Taş amebî destbendkerdene. E.T, O.F.T û B.T dimayê îfadeyî ameybî veradayîş. Husnugul Taş, Veysî Taş û tutê gumanbarî 14ê Adara 2020 de ameyî tepiştene. Derheqê înan de hetê serdozgerîya Komare ya Amedî ra sucê, ‘qestî kesî kiştiş’ û ‘bi ezîyet kesî kiştişî’ îdianame ame amadekerdene.

 

Husnugul Taş îfadeyê xo yê 12ê Adara 2020 de îdia kerd ke aye nêzana ke çira gonîya Muhammedî verê berê aye de ameya vînayîş û vat roja hedîse qet dest nêdaya.

 

Çîyê ke şahido nimte vat înkar kerd

 

Veysî taş zî îfadeyê xo yê 14ê Adara 2020 de dîyar kerd ke roja hedîse dimayê saetê nîmerojî şîyo keyeyê Husnugule destê xo şuto gonî destê ey de çinbîya û cilê xo vurnayo. Gumanbar Veysî vat, keyeyo ke Muhammed ci de ameyo vînayîş, qet nêşîyo. Veysî, îfadeyê şahido nimte ra ame persnayîş. Şahido nimte dîyar kerdibi ke şewa hedîse Husnugule ameya dikanê berberî yê Veysî û vata, ‘lez bike karê ma keye de esto. Lez bê' û dima ra Husnugule hîrê rey ameya û veng daya Veysî. Veysî, îdia kerd ke çîyêk wina nîno vîrê ci û tu eleqeyê zerrîya ey bi Husnugule dir çin o û îftereyan erzenê înan.

 

'Mi destê xo bi awa lêşîne şit'

 

Tuto ke îdianameyî de sey gumanbar ameyîne vînayene wina vat: "Roja hedîse ma kahweyê Î. bi lajanê ema xo Hanefî Katar û Mehmetî dir okey kay kerdêne. Dima ra ez rawişta şîya kehweyê Ramazanî. Ez wexto ke vejîyaya saete 22.05 bî. Ez texmînî 5 yan zî 10 deqeyan menda. Dedê mi Îdrîs Ortaş, Vahît Ozer û Sebahat Çakil okey kay kerdêne. Pîyê mi zî televîzyon temaşe kerdêne. Ez saete 22.05 de vejîyaya. Ez ameya verê berê Adem Katar înan awanîya xerabe de cinîyêke (Husnugul Taş) û camêrdêke bi Kurdî bêveng qisey kerdêne, vatêne ‘kes çin o bê. Camêrdî zî vatêne, ‘temam temam’ no camêrd zî Veysî Taş bi. Ez bawer a. Senîn veng ame mi, ez verê berê keyeyê Adem Katar çend gaman peyser şîya. Dima ra vengê padayîşê berî ame. 4-5 serrî verê o keye aîdê ma bi. O ber zî zehmet ameyîne padayîş. Ez nê baş zana. Dima ra cesaret ame mi û ez kewta zere. Tarî bi. Mi çakmak tafîna û Muhammed Velî Dumez erd de bi. Mi ewnîya ke merdo. Dima ez remaya û şîya awa taxe de mi destê xo şut. Mi va kes wa nêkewo guman û şîya verê kehwe."

 

Îdianameyî de ame vatene cigêrayîşê ke ameyê kerdiş de gonîya verê berê Husnugule û gonîya Muhammed yewbînan gêno û ame dîyar kerdene ke Muhammed keyeyo xerabe de ameyo vînaye beno ke uca de ameyo kiştene.

 

Ceza ameye waştene

 

Îdianameyî de ame vatene ke do delîlî bêrê ercnayîş, îfadeyê Veysî Taş û Husnugul Taş binaqokî yê û hewl danê ke xo nê sucî ra xelas bikerê, guman awan bîyê la tespîtêko somut nêameyo vînayene. Dozgerî raporê otopsî de dîyar kerd ke Muhammed bi kardî ameyo qetilkerdene û waştişê sucê ‘qestî kes kiştiş’ û ‘bi eziyet kesî kiştiş’ ceza waşt.

 

Îdianameyo ke ame amadekerdene hetê 2yîn Dadgeha Cezaya Giran ya Amedî ra ameye qebulkerdene û hîrê roniştişê dewa ameyî vînayene. Roniştişê peyîn de hîrê gumanbarî ameyî tahlîyekerdene.