Medya Uren

 

MÊRDÎN - Esnafê qij yê ke bê temînat xebityenê, yê ke krîzê ekonomî û janî tewr zêde tesîr bîyê pêwa prosesê normalbîyayîşî dest pêkerd zî krîz xelas nêbi. Wayîbe Çetînkaya û Sîdar Demîrcane zî vanê ê ameyê a sewîya ke kargehanê xo padê.

 

Tirkîya de krîzê ekonomî bi taybetî zî esnafê qijan tesîr kerd.  Semedo ke tirkîya ne wayîrê amedekarî û bingehêk qayîm ê ekonomîya û janê koronayî dir tesîrêk pîl kerd. Pêwa ke prosesê normalbîyayîşî dewam kerd zî esnafê cinî vanê ke başbîyayîşêke hetê ekonomîye ra nêvirazîyayo. Ê hema nêeşkenê girewtiş û rotiş bikerê.

 

Esnafa bi nameyê Wayîbe Çetînkaya ke cilan roşena û Sîdar Demîrcana kûafore problemê ke nê prosesî de cuyenê bi ajansê ma dir pare kerdî.

 

'Cinî hemverê keda xo nêgînê'

 

Wayîbe Çetînkaya dayîka 5 tutan a 7 serrî yo bi karê girewtiş û rotişê cilan dir eleqedar bena. Wayîbe wina vat: "Ma seke cinî bi taybetî zehmetîyê pîlan ciwîyenê. Hetêke karê keyeyî û hetêke ra zî endîşeyê debara keyeyî esto. Ez şefeq ra wirzena, werd û şimitiş dana tutan û derûdorê keyeyî pak kena. Dima ra yena cayê karî. Her roje ma wina derbaz bena. Ma seke cinî tu wext heqdestê xo tam nêgînê."

 

'Ganî polîtîkayê ekonomîye aver berê'

 

Wayîbe wina dewam kerd: "Ma her tewir krîz ra tesîr benê û temînatêke ma destek bikero zî çin o. Her rey ma yena a sewîya ke ma dikan padê. Hetêke ra ez padî zî do baş bibo. Semedo ke rotiş çin o. Demêk ra tepya ma kewenê mîyanê zirar. Ganî paştdayîşêk baş bêro dayîş. Pêro welatijî na rewşe de yê. Ganî polîtîkayê ekonomî bêrê averbîyayîş. Coka prosesê normalbîyayîşî dest pêkerd zî ma hema zî tengî de yê."

 

'Ez keyeyêkê wey kena' 

 

Sîdar Demîrcana 25 serrî 10 serrî yo bi karê kûaforî dir eleqedar bena. Bi 3 serrî yo zî kargehê xo akerda. Sîdare xo ciwanêka bi şans vînena, sebebê ci zî wina vana: "Nê prosesî de pêro ciwanî bêkar mendê. Mi zî bi îmkananê xo kargehêk akerd. Ez bi pereyêke tîya gêna, keyeyêke wey kena. Debara xo kena. Xeylêk ciwanî wayîrê nê şansî nîyê."

 

'Ma kewtê binê deynan'

 

Sîdare tewr peyîn wina vat: "Ma bendeyê prosesê normalbîyayîşî vindertî. Xora emsar zaf deynan ma viraşt. La rewşa ma nika zî sererast nêbi. Kes nêşino û nîno. Ma prosesê janî de kredî ant, ma do nika pereyê ci senî bidê ma nêzanê. Ganî hetkarîya esnafan bêro kerdene. Bi taybetî zî hetkarîya esnafê cinîyan. Semedo ke zehmetîyo tewr pîl ma vînenê. Ganî semedê xebitnayîşê ciwanan zî îmkanî bêrê ronayîş."