Viyan Seid/Elmas Nayif

 

ŞENGAL - Cinîyê êzidîjî dîyar kerdî ke 7 serrî yo Şengal de kedêke esto û vatî: "Ma bi tu hawa hemverê tehdîdan sere nêtewênenê. Ma do hemverê fermanêke bîn, bi hêzê xo xo bipawê."

 

Tevgerê Azadîya Cinîyan ê Êzidî (TAJÊ), Partiya Azadî û Demokrasîya Êzidijan (PADÊ), Temsîlkarê YBŞ-YJŞ, Asayîşê Êzîdxanî û temsîlkarê rêxistinê komelî bi rayberîya Meclîsê Xweserîya Demokratîkî yê Şengalî (MXDŞ) serê tehdîdê Hukmatê Federalî yê Iraqî, helwestê PDK û Tirkîya kombîbî. Kkombîyayîş de qerarê xoverdayîşî ame dayene û vengdayîşê wayîrvejîyayîşê Şengalî ame kerdene. Cinîyê Şengalî zî ajansê ma rê qalê qerarêko ameyo girewtiş kerdî.

 

'Ganî hêzê ma bêrê naskerdene'

 

Emîna Hecî mîyanê TAJÊ de ca gêna bale ant serê nêzdîbîyayîşê hukmatê Iraqî û wina vat: "Ma seke cinîyê êzidijî planê serê Şengalî de veng vejê. Ma nêverdenê reyke bîn dişmin bêro serê herra ma. Hukmatê Kazimî wazeno ke leşkeranê xo zêde bikero û bêro serê herra ma. La ganî bêro zanayîş ke ma sey cinîyê êzidî kesê ke hêzê ma, tutanê ma, asayîş û îradeyê ma tesdîq nêkerê, ma zî înan tesdîq nêkenê û nas nêkenê."

 

'Wendekarê serekî ma qetlîam ra xelisnayî'

 

Emîna, dîyar kerd ke 74 ferman ameyî meydan û wina vat: "Vernîya fermanî hêzê ma yê pawitişî çinbi. Ma bênasname û bêîrade bî. Fermanê serra 2014 de xêrcê wendekarê serekî kesêk nêame hewarê ma. Ma spasîyê înan kenê ke ma qirkerdiş ra xelas kerdî. Nika bi waştişê dewleta tirkî wazenê ke hêzê ma û tutanê ma çin bikerê."

 

'Ma tehdîdan ra nêtersenê'

 

Wetiha Reşo zî dîyar kerd ke tu wext planê şerî yê hemverê Şengalî qebûl nêkenê û vat: "Ma sey cinîyê êzidijî tehdîdê Iraqî qebûl nêkenê. Tutê ma hemverê nê tehdîdan xo feda kenê û ma do zî wayîrê tutanê xo vejîyê. Ganî bêro zanayene ke ma êdî tehdîdê înan ra nêtersenê. Tutê ma bi 7 serrî yo xo ver danê û ma pawenê."

 

'Ma do hemverê xiyanetî her wext têkoşîn bikerê'

 

Wetha, vat ke gelo Iraq ma ra çi wazeno û dewam de wina vat: "7 serrî yo ma azad ciwîyenê û nika zî nê wazenê. Ma eşkenê komelê xo bi hêzê xo bipawê. Pawitişê hêzê bînan lazim nîyo. Vernîya fermanî ma bêhêz bî û bi xiyanet cinî û tutê ma kewtî destê dişminî, bi hezaran kesî ameyî kiştiş. Ma hemverê hukmatê Iraqî nîyê, ma hemverê xiyanato ke wazenê ma çin bikerê yê."

 

'Heta peynî xoverdayîş'

 

Wetiha, dîyar kerd ke do wayîrê hêzê xo vejîyê û wina qedêna: "Ma do paştdayîş bidê tutanê xo û ma wayîr tutanê xo vejîyê. Ma nêverdenê keda tutan çin bikerê. Ma cinîyê êzidî wayîrê herre, ko û tutanê xo vejîyê. Ma do heta peynî têkoşîn bikerê. Ma veng danê her kesî ke bêrê wayîrê herra xo vejîyê."