ENQERE - Cinîyê meydanê Newroze veng dayî ganî tecrîdê serê Rayberê PKKyî Abdullah Ocalan bêro wedaritiş, dîyar kerdî ke tecrîd serê heme komelî kerdê û semedê wedaritişê tecrîdî vengdayîşê têkoşînê hempar kerdî.

 

Tecrîdo giran ya serê Rayberê PKKyî Abdullah Ocalanî her ke şino giran beno û reaksîyonê şarî zî hemverê nê girs benê. Hewteyo vîyarte de serê hesabêke çapemenîya komelî de derheqê rewşa weşîya Abdullah Ocalanî de hîn îdiayê ca girewtî û dima ra keye û avûkatanê Abdullah Ocalan semedê pêvînayîşî muracat kerdî. Pîrozkerdişê Newroze de bi sehezaran welatî, meydanan de waştişê azadîya Ocalanî kerdî. Welatîyê ke Enqere de ciwîyenê dîyar kerdî ke ganî tecrîd bêro wedaritene.

 

Hatîce Aras: Nika tecrîdêko giran serê Birêz Ocalanî de esto. Embazê ke zîndan de yê semedê wedaritişê tecrîdî kewtê grev. Ê zere de ma teber de têkoşîn kenê. Ma her wext verê embazanê xo de yê. Heta tecrîd bişiko do têkoşînê ma zî dewam bikero.

 

Yeter Çevîk: Ma tecrîd rast nêvînenê. Kes zî rast nêvîneno. Rayîrê aştîye bi şikinayîşê tecrîdî mimkin o. Ma aştîye wazenê. Semedê wedaritişê tecrîdî ganî game aştîye bêro eştene. Ganî waştişê şarî verê çiman de bêro girewtiş.

 

Nezahat Yaşar: Rayberê ma 22 serrî yo Îmralî de yo. Êdî bes o. Ganî tecrîd bêro wedaritene. Semedo ke tecrîd wirzo zîndanan de grev ame destpêkerdene. Ganî peynîya tecrîdî bîyarê. Ganî her kes bibo yew û vejîyo meydanan. Ganî na rewşe bêra protestokerdene. Çîyo ke ewro tutanê ma rê yen kerdene, do siba tutanê şima rê zî bêro kerdene.

 

Sîbel Goktaş: Tecrîd sucêko sîyasî yo. Bi amancê sîyasî serê Abdullah Ocalan tecrîd kenê. No helwestêko kêfî yo. Tecrîd tena zîndan de nîyo, nika beşêk komelî binê tecrîdî de yo. Şima meydanê Newroze ra banî rê her çî yeno vînayîş. Heme tepişteyî wayîrê heqê têduştîyê. Ganî bi keye û avûkatanê xo dir pêvînayîş bikerê. Heqê înan yê tewr sereyîn destê înan ra yeno girewtene. Abdullah Ocalan Rayberê şarê Kurdî yo. Ganî şar her ca bi vurno wareyê xoverdayîşê yê topyekun. Ganî ma têkoşîn de bibê hempar.

 

Sultan Demîr: Ma wazenê çîyê weş bibê. Ma wazenê Rayberê ma azad bibo. Ancax dinya wina weş bena û tutê ma verê ma de bê. Ma wazenê rewşa rayberê ra ma baş bibo.

 

Sakîne Kiran: Ez sey dayîkêke rayberê ma rê dua kena. Veng dana dewlete; êdî bes o, Rayberê ma vera bidê. Lajê mi zî tepişte yo. Pêwa ke ceza qedîyaya zî vera nêdanê. Homa nê zulmî qebul nêkero.

 

Nurcan Gur: Ez heme pêro embazanê tepişteyan bi heskerdiş û rêzdarî silam kena. Ez tirk a û her wext înan dir a. Ez hemverê dewaya înan rêzdar a. Wexto ke tepişteyî vêşan bê, ma zî nêeşkenê nan biwerê. No şar amadeyo ke çi bikewo serê milê înan. Ma aştîye wazenê. Wa êdî pê bikerê. YEwin waştişê ma oyo ke no şer biqedîyo. Wa tu dayîke êdî nêbermo.

 

Gulîstan Yavuz: Ez tepişteyê cinîyan silam kena û Newroza înan pîroz kena. Cinîyê her wext xo ver dayê. Na saete ra tepya sereyê xo nêtewênenê. Ez reyke bîn xoverdayîşê înan silam kena.

 

Munîbe Koç: Ma dayîkê Aştîye tecrîd nêwazenê û ma vanê peynî bibo. Tecrîd wirzo do aştî zî bêro. Tecrîdê serê Rayberî, yeno manaya ke cinî zî binê tecrîdî de yê û komel zî binê tecrîdî de yo. Yanî tecrîd serê merdimayî yo. Wa tecrîd wirzo ke nê grevî zî peynî bibê.

 

 Melahat Yilmaz: Ganî tecrîdê serê Rayberî bêro wedaritene. Ma semedê rayberî meydan de yê û ma semedê tepişteyê sîyasî ewro tîya yê. Yewin waştişê ma wedaritişê tecrîdî yo. Ma semedê demokrasî û aştî tîya de yê. Ganî heme şar bi hêzê xo tecrîdî wedarno.

 

Ferfurî Yalçin: Ma semedê heqanê xo zîndanan de yê. Ma heqdar ê. Ma meydanê Newroze de birêz Abdullah Ocalanî rê silam kenê.