Şehrîban Aslan

 

AMED - Avûkate Merve Guneşa ke tîmê voleybolê yê Baroyê Amedî de ca gêna dîyar kerd ke prosesê ameyoxde do tewrê musabakayan bibê û vatî na babete de bi îdiayê.

 

Avûkatê cinî yê Baroyê Amedî mîyan xo de tîmê voleybolî awan kerdî. Tîmo ke ame awankerdene, hetê avûkatan ra eleqeyêko pîl dî û roj bi roje tewrbîyayîş zêde beno. Yew avûkata baroyî û tîmî de ca gêna Merve Guneş a. Merve dîyar kerd ke awankerdişê tîmî fikrê hempar ê cinîyan bi.

 

‘Baro paştdayîş da ma'

 

Merve, vat çend avûkatê ke voleybol kay kerdêne înan dir ameyê têhet û fikrêko winasî vejîyayo û vat: "Ma vernîya pandemî de tîm awan kerd. Fikrê ci wina vejîya werte. Ma çend meslegdarê cinî ameyî têhet û ma vat, ganî tîmêke voleybolî bibo. Dima ra ma qerarê awankerdişî da. Ma kewtî tevger û ma fikrê xo serekê baroyî Cîhan Aydin û endamê Heyetê Îdarekarî Gazal Bayram Koluman rê neql kerd. Ê zî qasê ma kelecan bî. Ma kewtî tevger. Ma saha amade kerd, formê xo amade kerd. Baroyî paştdayîş da ma."

 

'Ma pê stres zî erzenê'

 

Merve dîyar kerd ke hemverê stresê ke her roje edlîye, zîndan û qereqolan de ciwîyenê çîyêko winasî fikrîyayê û vat: "No faliyetê sporî semedê ma zaf baş bi. Ma pê stres zî erzenê. Karê ma zaf bi stres o. Ma waşt ke qadêke ma pê stres berzê bibo. Ma şan de salone de yenê têhet û rîyê ma hemine huyeno. Ma bi enerjîyêke berz tewrê antremanan benê."

 

‘Antremanê ma her hewte yenê kerdene'

 

Merve vat ke antremanê ma her hewte yenê kerdene û dewam de wina vat: "Tîmê ma newe newe awan beno. Ma xo bi lez aver benê. Bêguman ma bi nê sînor nêbenê. Mabêne baroyan de musabaka virazênê. Baroyê Stenbol, Enqere û Îzmîrî her serre turnuvayan keno. Yewîya Baroyê Tirkîya zî di serran ra reyke musabakayan amade keno. Amancê ma oyo ke ma zî tewrê musabakayan bibê. Ma bi îdîayê."

 

'Baroyê ma xeylêk çîyan rê rayberî kerd'

 

Merve peynî de wina vat: "Tirkîya de tîmê her baroyî çin ê. Şaristanê pîlan de estê. Bi taybet tîmê voleybolî çin ê. Baroyê Amedî her babete de semedê baroyê herême xeylêk babetan de rayberî keno. Hûmara ma 20 derbas kerd. Ma serê çapemenîya koemlî de îlan kerd û meslegdarê ma xo resnayî ma û vatî ma zî tewrê ci benê. Ma bi lez pîl benê. Ma zaf kêfweş ê."