Aynur Aslan

 

AGIRÎ - Cinîyê Bazidijî reaksîyon vera padayîşê HDPyî dayî û vatî: "AKP îradeyê şarê Kurdî çin hesibneno, hemverê nê ganî ma zî paştdayîş bidê HDPyî."

 

Hetê Serdozgerîya Komare ya Dadgerîya ya Dadgeha Destûrê Bingehîn (DDB) bi waştişê padayîşê Partîya Demokratîke ya Şaran (HDP) dewa ame akerdiş û îdianameyê ame amadekerdene de zî derheqê 685 sîyasetmedarê HDPyî ra heta 5 serrî qedexeyê sîyasî ame waştiş. Hemverê waştişê padayîşê HDPyî de reaksîyon her ke şinê pîl benê. Bazidê Agirî de zî welatijan nêrazîbîyayîş nîşanê qerarî da.

 

‘AKP, HDP vernîya xo de sey asteng vîneno'

 

Emîne Ors: Îqtîdar HDPyî semedê xo asteng vîneno û no semed ra wazeno pado. Ez weçînîtoxa HDPyî ya. Ez bi HDPyî serberz a. HDP çimeyê cuya ma yo. HDP çinbo ma zî çin ê. Ma bi HDPyî dir waştişê xo ard ziwan. Partîya ma ya. HDP pêro zulm û teda serê şarî ano ziwan. Heta peynî heqê ma perseno û paweno. Nêeşkenê HDPyî padê. Hêzê înan qîm nêkeno. HDP bêro padayîş do yewo bîn abikerê. Wa dewlete xo nêxapêno. Kurdî her çî zanê. Heta peynî rayê ma semedê HDPyî yê.

 

'Ez eşkena HDP de her tewir wezîfe bigîrî'

 

Zozan Ergul: Ganî hemserekê pêroyî yê demê verê yê HDPyî Fîgen Yuksekdag û Selahattîn Demîrtaş bêrê veradayîş. Îqtîdar bi tedayan nêeşkeno şarê Kurdî bipelçiqno. Bi hezaran sîyasetmedarê kurdî ameyî tepiştiş, partîyê sîyasî ameyî padayîş. Pêwa nînan kurdan reyna partîya xo awan kerdî. Çira Fîgen û Selahattîn tepişteyê? Çira dişminîyê kurdan kenê? Gelo kurdan se kerdo? Kurd heqê xo pawito. Ez 90 serrî ya. Pêwa nê ez eşkena HDPyî de her kar bikera. Ma qet fek HDPyî ra vera nêdanê. Ma heqê xo pawenê. Demê verê zî Orhan Dogan ê ameyî tepiştiş. Ma înan xo vîr ra nêkenê. Ma heqê tutan pawenê. Em HDPyijî yê. Ganî heme kurdî bibê yew û wayîrê HDPyî vejîyê.

 

‘AKP hemverê îradeyê kurdan de rêzdar nîyo'

 

Mehtap Yildirim: AKP tu wext hemverê îradeyê kurdî rêzdar nîyo. HDP semedê kurdan destkewtişêke yo. HDP partîyêka ma temsîl keno. Bi xeyrê HDPyî ma îradeyê xo ramojna û ma xo pawit. Ma hemverê padayîşê HDPyî yê. Tirkîya welatêk demokratîk nîya. Taybetî zî hemverê kurdan. Ma bibê yew û hemverê padayîşê HDPyî de vinderê. Semedo ke HDP ma paweno.

 

'Semedê kurdan heq nîno naskerdene'

 

Refîka Yildirim: Semedê kurdan heq nîno naskerdene coka HDP yeno padayîş. Ma nêwazenê HDP bêro padayîş. Eke Tirkîya welatêk demokratîkbîne ma do bieşkayîne heqê xo bipawitêne. Partîyêke bîn abikerê ez o heqê xo bidê înan. Paştdayîşê mi semedê HDPyî yo û ganî her kes zî paştdayîş bido.

 

‘Îradeyê ma çin hesibnenê'

 

Fîlîz Koç: Bi padayîşê HDPyî dir îradeyê ma çin hesibnenê. Semedê temsîlkarê Kurdanê mi vengê xo her wext dayîne înan. HDP îradeyê min o. Rayanê ma çin hesibnenê. DEHAP ra heta nika xeylêk partî awan bî. Kam ci ame padayîş vera ci yewo bîn abi. Ganî pêro weçînotoxî reaksîyon ramojnê.