AMED - Aktîvîsta TJAyî Sîyajîn pîrozbîyayîşê Amedî ercna û vat: "Girseyo ke meydanê Newroze pir kerd, heta peynî waştişê azadîya Birêz Ocalanî, wedaritişê tecrîdî û aştî ardî ziwan. Ma nê qîrînî ra fam kenê ke şar, cinî û ciwanî tu wext fek xoverdayîş ra vera nêdanê."

 

Emsar Newroze bi şîarê 'Ma bi adirê Newroze xo ver bidê û azad bibê' ame organîze kerdene. Herême û şaristanê Tirkîya de Newroze bi heybetêko pîl ame pîrozkerdene û cinîyan mohrê xo dayî piro. Cinîyan bi cil û belgê xo yê adetî, verê xo dayî meydanan û mesajê, 'ma fek kultur, ziwan, heq û azadîyê xo vera nêdanê' dayî. Amed Tevgerê Cinîyan ê Azadan (TJA) verê 8ê Adare û seranserê pîrozbîyayîşê Newroze meydanan de çalakî û bername viraşt. Aktîvîsta TJAyî Sîyajîn Nefîse Yildirmaz, cinîyê ke bi kultur, ziwan, reng û xoverdayîşê xo vejîyayî meydanan ercnayî.

 

Sîyajîne bale nat serê adirê tarîxî yê merdimayî de û vat: "Adir mîyanê demî de sey hacetêke germbîyayîşî, pewjnayîşê xidayî û heta hacetê xebergirewtişî de ameyo xebitnayîş. Adir komelî ra ameyo diznayîş û bîyo hacetê îqtîdarî. Ma nê zî mîtolojî ra musenê. Gelo çi bi ci ame ke adiro pîroz feydeyê şarî bi, demêk de semedê veşnayîşê ameyo xebitnayîş? Merdimê ke newe adir kifşkerdî gelo zanayîne ke do adir rojêke semedê veşnayîşê cinîyan bêro xebitnayîş? Ney nêzanayîne. Îqtîdaran bi metodê xo hemverê komelî de xebitnayê."

 

'Newroze ewro zî nîşaneyê serkewtişî ya'

 

Sîyajîne dewam de wina vat: "Komelî tu wext fek çîyê aîdê xo ra vera nêdayo. Geyrayîşê heqîqetê xo dewam kerdo, rayîrê îfadekerdişê cigêrayîşê xo dayê werte. Seke Kawayê Hesinkarî ke vera zulmê Dehaqî rayîrê xelisnayîşî geyrayo. Adirê Newroze ke ewro zî seke roja serkewtişî, azadî û ameyîşê wisarî yena vînayîş, roja ke Kawayê Hesînkarî, zorê Dehakî berd, serê qilî de semedê mijdîyanîya serkewtişî bido şar tafînayo."

 

'Keda pîlî ya cinî û ciwanan esta'

 

Sîyajîne vat ke Newroze semedê ciwananê kurdî tewr bi mana ya û vat: "Ma nê hêvî û kelecanîyê pîl yê serra 1990ine de serê qilê pîlde ameyîne tafistiş zanê. Ma xoverdayîşê şaro ke her çî dabi verê çimanê xo, herikyayîne meydanê Newroze ra zanê. Bi taybet rojê peyîn de amadekarîyê Newroze de cinî û ciwanî bi heybetêko pî xebatan kenê û kede û lebatêke pîl de yê. Ma nê baş vînenê."

 

'Cinî, ciwan û şaran fek têkoşîn ra vera nêdayî'

 

Sîyajîn tewr peyîn wina vat: "Wexto ke ma vilawike vila kerdêne, ciwanan vatêne 'medê ma, xora ma zanê û ma yenê' ma samîmiyet, bawerî û girêdayîşê înan baş vînenê. Pêwa hende teda, destbendkerdiş û tepiştişan, pêwa şertê pandemîyî her çar hetê welatî ra meydanê Newroze pir bî. Girseyo ke meydanê Newroze pir kerd, heta waştişê azadîya Birêz Ocalan, wedaritişê tecrîdî û aştîye ardî ziwan. Ma nê qîrînayîşî ra fam kenê ke şar, cinî û ciwanî tu wext fek xoverdayîş ra vera nêdanê."