Sema Çaglak

 

Newroza emsar şaristanê herême û şaristanê Tirkîya de bi tewrbîyayîşê sehezaran bi coşêke pîl ame pîrozkerdene. Bi taybetî coş û ruhê xoverdayîşî xo tewr zêde Amed û Wan de xo ramojna. Newroza Amedî Parkê Newroze ya Qezaya Rezanî de bi tewrbîyayîşê sehezaran kesî ame kerdene. Newroza Amedî de tewr zêde babetê tecrîdê serê Rayberê PKKyî Abdullah Ocalanî, grevê vêşanîye, padayîşê HDPyî û Yewîya şarê Kurdî vejîyayî vernî. Cinîyê ke tewrê Newroza Amedî bîbî, dîyar kerdî ke ê do qetî serkewte bê.

 

'Wa tepişteyî sîyasî azad bibê'

 

Yildiz Aksoy destpêkê qiseykerdişê xo de Newroza pêro kurdan pîroz kerd û wina vat: "Verê Newroze de ma kewenê mîyanê tevgerêko germ. Ma xo semedê Newroze amade kenê, werd û şîrînayî viraznenê. Newroze coşêko pîl dano ma. Ez qijî ra heta ewro her wext tewrê Newroze bena. Eke ma bi cil û belgê xo yê adetî nêrê a Newroze weş nîya. Wexto ke vanê Newroze tewr zêde têkoşîn û xoverdayîş yeno vîrê mi. Sewbîna ez silamanê xo semedê tepişteyê sîyasîyan erşawena û Newroza înan pîroz kena. Tepişteyî grevê vêşanîye de yê. Ez wazena wa waştişê tepişteyan bi ca bêrê û tepişteyî azad bibê."

 

'Ma do qetî serkewte bibê'

 

Rozerîn Durman zî yew ê cinîyan ra ya ke bi cil û belgê xo tewrê mîtîngî bîye û wina vat: "Ma semedê tedayê serê şarî zêde nêeşkenê tewrê çalakî û pîrozbayî bibê. La ewro meydan de tewrbîyayîşêk zaf xurt esto. Coş û xoverdayîşê şarî zêde yo. O zî moralêk zaf pîl dano ma. Ma do ewro meydan de bi reng û vengê xo semedê grevê vêşanîye, semedê tecrîdî, semedê hêrişê serê HDPyî û semedê tedayê serê şarê Kurdî bi cewab. Ma do bi resê amancê xo û ma do qetî serkewte bê. Biciwîyo xoverdayîşê zîndanan, Biciwîyo xoverdayîşê şarê Kurdî û cinî ciwîyayîş azadî."

 

'Ma do azadî bivînê'

 

Ayten Kiliç zî derheqê Newroze de wina vat: "Waştişê ma yê kurdan aştî, azadî û cuyêka bi rûmet a. Heta ke ma ra yeno ma do têkoşîn bikerê û xo ver bidê. Ma nêkewenê û tu wext nêkewê. Ma bi hêz ê ewro zî no aseno. Şarê Kurdî nêkewenê. Kurdî serfiraz ê."

 

'Ma heyfê parî emsar vet'

 

Xecê Daşgin zî dîyar kerd ke şar bi coş û xemla xo ware pir kerdo û vat: "Newroze semedê ma rojêke zaf pîroz a. Par ma semedê pîrozbîyayîşî biqerar bî la weşîya şarî tewr girîng bî û Newroze nêameye pîrozkerdene. La emsar ma heyfê parî vet. Pandemî hetêke ra û rewşa sîyasî hetêke Newroze semedê pêro kesan bî cewabêka xurt. Bêguman cinî bi weşikîya xo û rengê xo meydan xemilnayî."