MÊRDÎN - Tepişteyo sîyasî Seyîtxan Yamano ke nêweş o 3 serrî yo hucreyê yewkesî de yeno tecrîdkerdene. Dayîka Seyîtxanî, Xezal Alan zî bale ant serê rewşa weşîye ey û wina vat: "Cayê tepişteyê nêweşan zîndan nîyo. Ganî peynîya tecrîdê înan bêro."

 

Binpaykerdişê heqan ê zîndanan her ke şino zêde beno. Tepişteyê sîyasî û bi taybet zî tepişteyê nêweşî yenê tecrîdkerdene û heme heqê xo ra yenê mehrûmkerdene. Tepişteyo sîyasî Seyîtxan Yaman ke Zîndanê Tîpê F yê Xarpêtî de maneno, problemê pîl yê weşîye ciwîyeno. Pêwa nêweşîyanê xo 3 serrî yo bêsuc hucre de yeno verdayîş. Keyeyê Seyîtxanî waştişê dade kenê.

 

'3 serrî yo Seyîtxan yeno tecrîdkerdene'

 

Xezale Aslan bale ant serê rewşa Seyîtxanî û wina vat: "Seyîtxan, bêsuc 5 serrî yo zîndan de yo. 34 serrî ceza ci rê ameye birnayene. Wexto ke tepiştê heta roja ewro îşkence bi înan yeno kerdene. Bi 3 serrî yo bi bahaneyê ke 'do zirar bido' kenê hucreyê yewkesî. Bi 3 serrî yo yeno tecrîdkerdene. Heme heqanê xo ra yeno mehrûmkerdene. Wextê sporî de zî ê benê cayêke tena."

 

'Rewşa ey ya weşîye baş nîya'

 

Xezale wina dewam kerd: "Rewşa Seyîtxanî ya weşîye baş nîya. Lingê ey kîrêç girewtê û sîneyê ey de zî problemê girîng estê. Semedo ke nêeşkeno vejîyo, yan zî wareyê ey ke şêro û bêro çin o û rewşa linga ey tewr xirab bena. Her roja ke şino astengîyê ey pîl benê. Semedê rewşa Seyîdxanî ya weşîye pîl nêba, ganî ey hucreyê yewkesî ra vejê. Ganî şert û mercê înan ê cuye bêrê sererastkerdene.”

 

‘Tecrîd suc o’

 

Xezale tewr peyîn wina vat: "Eynî wextî de ey surgun kerdê. Ganî hîn nêzdîyê ma bikerê. Emrê mi û pîyê ey pîl o. Ma nêeşkenê bibê raywan. Ma xeylêk rey waştiş kerd ke nêzdî bîyarê. Yan zî hucre ra vejê. La pêro waştişnameyê ma bêcewab mendî. Ez seke dayîkêke tengayî de ya. Problemê min ê weşîye estê. Lazim o nê çî bigîrê verê çiman. Ma nêeşkenê nê dejî wedarnê. Ganî peynîya tecrîdî serê înan de yeno kerdene bêro."