Şehrîban Aslan

 

AMED - Avûkate Hatîce Demîr redkerdişê tewrbîyayîşê dewaya cinîyan ê Merkezê Heqê Cinîyan yê Baroyê Amedî ercnayîş kerd û vat: "Sucê ke cinî mexdûr benê de, wexto ke cinî hesabê nê pers kenê, zaf nêrehet benê. Nê prosesî peyîn de ma nê zaf zêde hîs kenê."

 

Îqtîdar û hukm ke çareserîyêk şîdetî camêrdan rê nêvînenê, vernîya sazgehê ke çareserîya şîdetê ke cinî hedef yenê girewtiş û yenê rojeve. Merkezê Heqê Cinîyan ê Baroyê Amedî zî waştibi ke tewrê dosyayê kiştişê cinîyan û şîdetê serê cinîyan de yê bibê, labelê waştişê înan ame redkerdene. Nimûneyê nê zî dosyayê Denîz Ketîr û Melek Aslan ke qezaya Yenîşehîrî ya Amedî de hetê birayê xo ra ameybî qetilkerdiş de ame vînayene.

 

Endama Merkezê Heqê Cinîyan avûkate Hatîce Demîr vat, redkerdişê tewrbîyayîşî, qerarêke polîtîk o.

 

'Amancê ma vernîgirewtişê şîdetî yo'

 

Hatîce dîyar kerd ke sey Merkezê Heqê Cinîyan ê Baroyê Amedî, hewl danê ke tewrê dosyayê qetilkerdişê cinîyan û şîdetê serê cinîyan bibê û vat: "Xeylê waştişê ma yê tewrbîyayîşî de redkerdiş beno. Bahaneyê înan zî oyo ke suc ra zirar nêdîyê. Ma vanê ke dosya heme cinsîyetê cinî hedef gêno. Ma îfade kenê ke semedê pêro cinîyan tehdîd awan keno, komelî de înfal awan keno û semedê têkoşînî zî ganî bi rêxistinê cinîyan û STOyan dir tebger bibo, polîtîka bêro averşîyayîş. Semedê nê zî ma vanê ke ma suc ra zirar vînenê."

 

'Qanûnan de heqê tewrbîyayîşî esto'

 

Hatîce dîyar kerd ke hîn dosya de tewrbîyayîşê înan yeno qebulkerdene la dosyanê krîtîkan de nîno qebulkerdene û vat: "Bêguman no polîtîk o. Sucê ke cinî mexdûr benê de wexto ke cinî hesabê nê pers kenê, zaf rehet benê. Ma nê demê peyînan de zaf zêde hîs kenê. Hemverê cinîyê ke nê ware de xebate kenê de vatişê nefretî estê. Marjînalkerdiş û dişminkerdişê cinîyan babeta vatişî yo. No nêzdîbîyayîş raste rast tesîr serê wareyê ma keno. La hem pêkerdişê mîyanneteweyî yê Tirkiya îmza kerdê û hem zî huqûqê zereyî de heqê mudaxîlbîyayîşî esto la no heqê ma yeno astengkerdene. Madeyê 55ine Pêkerdişê Stenbolî de bi kilmkî wina yeno vatene: "Eke şîdetê serê cinîyan bibo, semedê têkoşînê hemverê hedîse, pawitişêmexdûr û gumanbar ceza bigiro şima eşkenê bi rêxistinê cinîyan û STOyan dir hemkarî bikerê. No madeyê 15ine ê Qanûnê 6284 de zî esto."

 

'Wexto ke gumanbar keye ra bo ma nêeşkenê cinî bipawê'

 

Hatîce dewam de wina vat: "Nimûneyê nê, dosyayê Denîz Ketîr û Melek Aslane yo. Semedo ke gumanbar keye ra yê, keye ra ma nêeşkenê vekaleto taybet bigîrê. Semedê nê zî wextê tewrbîyayîşê ma yê dosyayan bêro redkerdene, ma nêeşkenê semedê cinîyan edalet bigeyrê û heqê înan bipawê. Mekanîzmayêke ma ya ma cewab bidê îftîrayan nêmaneno."

 

'Dosyayan ma ra remnenê'

 

Hatîce bale ant serê qerarê nimte yê semedê dosyayan yeno dayîş û vat, bi taybetî serra 2015 de heta nika hema hema semedê heme dosyayan qeraro nimte yeno dayene û sebebê nê zî oyo ke rêxistinê cinîyan, sazgehê cinîyan hesap pers nêkerdî, semedo ke rayaumumî nêro munaqeşekerdene û semedê nê zî dosyayan remnenê.

 

Hatîce tewr peyîn wina vat: "Ma destpêk ra heta peynî bî taqîbkerdoxê dosyayê Melek Aslan. Ma nimûneyê dosya waşt û ma şî verê dozgerî. Ma vat, ma beşdar bîyê. Pêwa ke qeraro nimte çinbi, dozgerî cade qerarê nimtişî da. Dosya ma ra remnayî. Nika zî semedê ke ma têkilîyê vekaletî awan nêkerdo ma ra remnenê. Hem ma ra hem rayaumumî ra remnenê. Çi heyf, nêzdîbîyayîşê hukmî bi pêroyî serê awankerdişê keyeyî yo. Çi şîdet bêro ciwîyayîş zî vanê na babetêka keyeyî ya. Ganî mîyanê keyeyî de bêro çareserkerdene û cinîyan terkê mergê bêveng kenê. Semedê nê zî têkoşînê topyekun girîng o.”