Dîlan Babat

 

COLEMÊRG - Keyeyê Alî Kaval ke xoverdayîşê îdarekerdişê xoser yê Geverî de ame qetilkerdene, hema zî têkoşînê huqûqî dano. Pîyê Alî, Abdulhekîm Kaval wina vat: "Heta ke ez sax bî, ez o serê dewa de vinderî. Tena semedê lajê xo ney, semedê pêro tutan xo ver bidî."

 

Qezaya Geverî ya Colemêrgî de hetê Meclîsê Demokratîkî ya Geverî ke 1ê sibata 2016 de ame awankerdene de deklere kerd û îdarekarîyê xoser îlan kerd ra dima  qedexeyî dest pêkerdî. 13ê adara 2015 de xoverdayîşê îdarekerdişê xoserî ame îlankerdene û nê dir qedexeyê tebervejîyayîşê kuçeyan ame kerdene û 79 rojan dewam kerd. Qedexeyan de bi seyan kesî ameyî qetilkerdene, keyeyî ameyî veşnayîş û welatijî nêeşkayîne keyeyê xo ra vejîyê. Goreyê dayeyê nêzelal nêzdîyê 90 kesî xoverdayîş de dinyaya xo bedilnayî. Nînan ra yew zî Alî Kavalo ke 1ê adara 2016 de ame qetilkerdene bi.

 

Wa her kes bizano, kes nêkeno xo vîr ra...

 

Bi wesîleyê serrgerra proseyê qedexeyî, ma şî serdayîşê keyeyê Alî Kaval. Dayîka Alî dîyar kerd ke dejê aye sey roja ewil o û wexto ke yeno vîr hîna zaf nêbaş hîs kena û xora qet xo vîr ra nêkerdo. Dayîke vat ke wa pîyê Alî qal bikero û her çiqas nêrehetîyê pîyê ci estbî zî vat, wa tu kes çîyê ke ameyê ciwîyayîş nêkero xo vîr ra.

 

'Wexto ke mi cenaze dî ez şok bîya'

 

Abdulhekîm dîyar kerd ke wexto ke Alî dinyaya xo bedilnayo o qezaya Çelê de înşat de xebityayo û vat: "Vatî pîyê to nêreheto bê. Ez şîya Nêweşxaneyê Dewlete ya Geverî. Qelebalix bi. Birayê mi ame vat sereyê to sax bo. Pêro keyeyî nêweşxane de bî. Dejê înan pîl bi. Panzer û polîs estbî. Parlamenteran şî înan îqaz kerdî. Dima ra mi waşt ez şêra morg. Pêwa ke mi da ber ro zî anêkerdî. Mi pê palikan da akerdiş. Dozgerî cenaze mojna ra. Wexto ke mi cenaze dî ez şok bîya. Sereyê lajê mi de birînêke pîl estbi. Vernê de dabî çaqeyê ci ro, dima ra gule sereyê de varnabî."

 

Abdulhekîm vat ke lajê mi semedo ke tute xo rê paç kincikan bigîro vejyabi û vat: "Lajê mi şi û nêame. Polîsan hêriş kerdo. Embazî nêzanabî Alî tena ûca de yo. Alî ûca de şehîd kono, embazê ey gênê û benê keyeyêk. Ûca ra zî kenê betanîye û anê keyeyê ma. Keye de birînê ey germ bîya. Destê dayîka xo gêno la nêeşkeno qisey bikero. Xeylêk zere mi veşana, semedo ke mi wesîyetê lajê xo yê peynî nêzana."

 

'Nê tutan bêsebeb qetil kerdî'

 

Abdulhekîm dewam de wina vat: "Dêsê keyeyê ke Alî ci de ameyo qetilkerdene, hema zî rêça guleyan esta. Wexto ke Alî benê nêweşxane, polîsê verê nêweşxane huyayê û çepik dayê piro. Vatî, ‘ma berpirsîyarê taxa Esentepe kişt’. Dayîk û dedê ey wazenê ey bivînê la ma destûr nêdanê. Ma avûkatêk girewt ke cipersayîş bikero. La vatî, ‘Alî terorîst o, hemverê polîsan wişto û ma mecbûr mendê ke bikşi.' Hema dadgehe dewam kena. Heta ke ez saxbî ez o dewaya xo dewam bikerî. Ez tena semedê lajê xo ney, ez o semedê pêro tutê ke bêsebeb ameyê kiştiş xo ver bidî. Nê merdimî vêşan mendî, têşan mendî, bêhewn mendî. Tutê ma semedo ke keye, cinî û tutê înan rezîl nêbê xo ver dayî."

 

'Canê ma veşa'

 

Abdulhekîm vat ke dimayê Alî, semedo ke pêrodayîşî bîyê zêde Gever ra vejîyayê û şîyê Colemêrg û wina vat: "Ma pêrodayîşan televîzyonan de temaşe kerdêne. Wexto ke ma agêrayî Gever, ma nêeşkayî rewşa Geverî ra biewnê. Keye wêran kerdibî. Ma heme çî derbaz kerd la ê ciwanê ke ameyî qetilkerdene. Tewr zêde ciwanê ma kezeba ma veşnayî. Ma qetî nê çîyan nêkenê xo vîr ra. Ma ê nuşteyê ke ameyî nuştiş xo vîr ra nêkenê. Ma prosesêko zehmet ra derbaz bî. Ma ciwanê ke ameyî qetilkerdene xo vîr ra nêkenê."