Safiye Alagaş

 

AMED - Endama Komîteya Tertîpî ya Newroza Amedî Zelal Bîlgîn dîyar kerd ke do bi coş, enerjî û heme rengê xo yê 8ê Adare meydanê Newroze de bê.

 

Amed de 12ê Adare de semedê pîrozkerdişê Newroza 2021 deklerasyon ame eşkerakerdene. Pîrozkerdişê Newroze ke do bi şîarê 'Ma adirê Newroze xover bidê azad bibê' organîze bibo. Komîteya Tertîpî ya Newroza Amedî zî amadekarîyê rêxistinbîyayîş û teknîkî dewam kena. Adirê Newroza vernê de ewro Xelfetî yê Rihayî de bêro tafînayîş. Endama Komîteya Tertîpî ya Amedî Zelal Bîlgîn manaya Newroze ya semedê şarê Kurdî û prosesê amadekarî erjna.

 

'Semedê Newroze bedelê pîlî ameyî dayene'

 

Zelale dîyar kerd ke Newroze semedê şarê Kurdî xoverdayîş a û şarê Kurdî semedê Newroze meydanan de pîroz bikerê, bedelê pîl dayê. Zelale wina vat: "Bi seyan kesî semedê Newroze pîroz bikerê dinyayê xo bedilnayî. Xoverdayîş û serewedaritişê Kawayê Hesinkarî vera zalim Dehaqî yo. Şertê ewro de zî xoverdayîş vera zulmî esto. Kurdî her çar hetê dewletan ra rastê zulmî yenê. Hêriş her ke şino giran beno. Semedê nê tarîx de Newroze ewro zî xoverdayîş û azadî ramojnena."

 

'Ma rayberê xoverdayîşî yê'

 

Zelale dewam de wiina vat: “Bêguman pêwa nê ma semedê nasnameyê xo yê neteweyî zî rastê hêrişan yenê. Semedê nê zî ma xo rayberê xoverdayîşî nas kenê. Roj bi roje ma zemînê rêxistinkerdişî de zî benê rayber. Newroze seba ma zaf girîng û manayîn a. Newroze mujdîyanê wisarî ya, cuya newe ya, toximê xoverdayîşî ya. Newroze yewîye û netewbîyayîş esas gêna. Serra vîyarte de ma Newroze meydanan de pîroz nêkerd. Emsar ma 8ê Adare wexto ke ma pîroz kerd, ma vat gelo ma do 21ê Adare zî pîroz bikerê. Bi enerjîya ma ya girseyê 8ê Adare girewt ma do emsar Newroze zî bi coş û kelecanêke pîl pêşwazî bikerê. Emsar Newroze wayîrê manayêke pîl a. Nuqtayêke têkoşînê azadîye nîşan dana.”

 

'Ma do bi ruhê yewîye vejîyê meydanan'

 

Zelale bale ant serê prosesî û vat: “Girseyêke ke her meydanan de cewabê înan bido esto. Semedê nê zî do Newroze her kuçe de bi coş bêro pêşwazîkerdene. Verê zî bi mîlyonan kesî semedê pîrozkerdişê Newroze vejîyayîne meydanan. Bêguman Newroza 2013 de hetê tarîxê têkoşînê Kurdî de cayêko girîng gêno. Prosesê çareserî bi û semedê çareserî deklerasyon amebi kerdene. Bi mîlyonan kesî semedê azadî vejîyabî meydanê Newroze. A roje ra heta ewro zaf çî vurya. Polîtîkayê şerî lez bî. Heqê cuye, heqê tutan, cinîyan û muxalîfan yeno xespkerdene. Semedê nê ma do bi ruhê yewîya neteweyî vejîyê meydanan."

 

'Ma reaksîyonê xo da meydan'

 

Zelale tewr peyîn wina vat: "Bi waştişê caardişê yewîya neteweyî û semedê ma teda û zulmî rê bibê cewab ma pêro kesan dawetê meydanê Newroze kenê. Ma 21ê Adare de meydanê Newroze de bêrê têhet. Ma vera tecrîdî serewedaritişê xo vejê werte."