Sema Çağlak

 

AMED - Platformê Ziwanê Kurdkî û Torra Ziwan û Kulturê Kurdkî, semedê ziwanê kurdkî bibo ziwanê fermî û perwerde, 22yê sibate de kampanyaya îmzeyan dabi destpêkerdene û kampanya roj bi roje bena hîra. Nuştoxê cinî vengdayîşê paştdayîşê kampanya kerdî.

 

Platformê Ziwanê Kurdkî û Torra Ziwan û Kulturê Kurdkî bi minasebetê 21ê Sibate Roja Ziwanê Dayîke ya Dinya, 22yê sibate de dest bi kampanyaya imzeyan kerdî. Kampanyaya ke bi sloganê, “Wa ziwanê kurdkî bibo ziwanê fermî” û “Wa ziwanê kurdkî bibo ziwanê perwerdeyî” dest pêkerd. Wayîrvejîyayîşê kampanya ke bi îmzeyê kuçeyan û bi hawayêke online yenê komkerdene, dewam keno, roj bi roje tewr zêde beno. Nuştoxan bale nat serê girîngîyê nê kampanya û vengdayîşê paştdayîşî kerdî.

 

'Ziwan bingeyê cuye yo'

 

Hemsereka Komeleya Edebîyatê Kurdî Sultan Yaray dîyar kerd ke ziwan bingeyê komelbîyayîşî yo û vat: "Giringî û tesîrê ziwanê dayîke serê komelî de çîyêko verçim o. Ziwan bingeyê cuye yo. Her netew bi ziwanê xo esto. Ziwan nasname yo, kultur o, edebîyat o, şîîre yo, hîs o, reng o, bîyayîş û çinbîyayîşê şaran o. Ziwanê kurdkî pêwa ke zêdeyê seserre yo ke ameyo qedexekerdene zî, semedê pawitişê ci kurdî her wext xo ver danê."

 

'Wayîrvejîyayîşê na kampanya ferz a'

 

Sultane, dewam de wina vat: "Semedê pawitişê ziwanî madeyo girîng oyo ke bibo ziwanê perwerdeyî. Semedê ke bibo ziwanê perwerdeyî, emsar sazgeh û komeleyê ke xizmetê ziwanê kurdkî kenê 21ê Sibate Roja Ziwanê Dayîke ya Dinya de kampanyaya îmzeyan dayî destpêkerdene. Wayîrvejîyayîşê na kampanya semedê pêro kurdan ferz a. Wayîrvejîyayiş bibo, xora çîyê bîn do pey ra bêrê."

 

'Ganî tutî bi ziwanê dayîke pîl bibê'

 

Nuştoxe Fatêxan Taşli Tunç zî dîyar kerd ke ziwan û kultur, bîyayîş û çinbîyayîşê şarêke yo û vat: "Şarê ke kultur û ziwanê înan bêro qedexekerdene, bi çinbîyayîşî dir rî bi rî manenê. Tutê ke bi ziwanê dayîke pîl nêbê û perwerde nêbê, tim hetêk înan kêm o. mîna berxikê mîjo ye, tim aliyek xwe kêm e. Kultur û ziwanê ma bi hezaran serre hetê pîr û kalanê ma ra bi rayîrê sanik û kilaman ra ameyo pawitene, çi heyf ke nika bi asîmîlasyonêk xidar dir rî bi rî mendo. Yeno waştene ke xêzeke sûr biancê serê kultur û ziwanê kurdkî. No het ra rolo tewr girîng keweno serê milê dayîkan. Ganî ma ziwanê xo,bi tutanê xo dir nêdê xovîrrakerdiş."

 

'Ganî tutî mekteb û unîversîteyan ra ziwan bimusê'

 

Şaîre Nurcan Delîl zî vat, ganî kurdkî qanûn de bêro naskerdene û wina dewam kerd: "Na kampanya erey mende. Her kes bi ziwanê xo yeno naskerdene. Ziwan tena hacetêke yê neqlkerdişî nîyo. Ziwan; tarîx, kultur û nasname gêno zereyê xo. Cuyêka bê lal nêeşkena xo dîyar bikera. Semedê ziwanî qanûn lazim o. Ganî pêro qedexe, astengî û astengîyê vernîya Kurdkî bêrê wedaritene. Ganî tutê kurdan mekteb û unîversîteyan de ziwanê xo bimusê. No heqêke xozayî yo, no heqêke merdimayî yo, no heqêke unîversal o."

 

'Na kampanya tesîrêke kerd'

 

Nurcane dîyar kerd ke şarê kurdî bendeyê gam eştişî bî û vat: "Na kampanya nika tesîrêko xurt dayo serê heme kesan û bi kelecan ê. Ez bawer a do şarê Kurdî ziwanê xo ra wayîr vejîyê. Xebitnayîşê ziwanê xo de wayîr vejîyê. Xebitnayîşê ziwanê dayîke do tutan keye rê girê bido. Do kêfweşîya înan berz bo û psîkolojîyê înan rê baş bo. Xebitnayîşê ziwanê dayîke verdeno ke şima çîyêk tutanê xo rê bimusnê û pîya çîyê newe bimusê."

 

'Wa pêro kurdî paştdayîş bidê na kampanya'

 

Nurcane tewr peyîn wina vat: "Ziwanê kurdkî wareyê pêroyî de gerek bêro xebitnayîş. Ma wazenê pêro kurdî îmza bikerê. Na kampanya partî û sazgehêke sîyasî nîya. No semed ra ma wazenê hem kurdî, hem bazirganî, hem roşnvîrî her kes bi ziwanê xo yeno naskerdene paştdayîş bidê na kampanya. Lazim o ke nê xebatî dewam bikerê heta ke Kurdkî bibea ziwanêke fermî, heta ke biba ziwanê musayîşî. Ez bawer kena ma do serkewte bibê. Her çend na kampanya binê nameyê Platformê Ziwanê Kurdkî û Torra Ziwan û Kulturê Kurdkî de ameya dest pêkerdene zî, bingeh de kampanyaya heme kurdan a."