Sema Çaglak 

 

AMED - Cinîyê Amedijî bale ant serê  çalakîya grevê vêşanîye ke 107 rojî dewam keno û dîyar kerdî ke wa waştişê tepişteyan bi ca bêrê û aştî bêro.

 

Çalakîya grevê vêşanîye ya hemverê tecrîdê serê Rayberê PKKyî Abdullah Ocalan û binpaykerdişê heqê zîndanan ke 27ê Teşrîna Peyêne 2020 de zîndananê Tirkîya û herême amebi destpêkerdene roja 107ine de dewam keno. Sewbîna pêwa keyeyê tepişteyan, sîyasetmedar, aktîvîst û avûkatê heqê merdiman zî bale ancenê serê girîngîyê çalakî û vengdayîşê hîsgêrî kenê. Cinîyê Amedijî zî derheqê babete de ajansê ma rê qisey kerdî.

 

'Ma n eşer ne zî merg wazenê'

 

Rukîye Keser dîyar kerd ke şer nêwazenê û vat: "Ez omid kena ke ma do bi ser kewê û do pêro tepişteyê ma zindanan ra vejîyê. Ma wazenê ke serekê ma binê nê zulmî ra xelas bo û azad bibo. Ma şer û kiştiş nêwazenê. Ma cuyêka azad û bi rûmet wazenê. Temamê dinya de zulmo ke kurdan rê yeno kerdene, tu cayêk de nîno kerdene. Ma nêzdîyê 60 mîlyon kurdî estê. Heqê ma yenê binpaykerdiş. Şarê Kurdî se kerdo ke hende zulm vîneno. Ma tu kes talan nêkerdo û zulm nêkerdo. Tena dewaya heqê xo kenê. Ma dewaya nasnameyê xo, dewaya ziwanê xo kenê. Wa êdî bes tutanê ma bikşê."

 

'Wa tecrîd bêro wedaritişî'

 

Rukîye dewam de wina vat: "Tepişteyî tutê nê şarî yê û zulmo ke kurdan rê yeno kerdene qebul nêkenê. Êyê ke taciz û tecawuz kenê serbest vera danê la êyê ke heqê xo pawenê binê zulmî de yê. Tepişteyî wazenê tecrîd peynî bibo û ma zî wazenê. 3 mengî ra zêdeyêr o ke tutê ma çalakîya grevî de yê. Tutê ma 3 mengî yo vêşanê. Ka wîjdan, ka huqûq, ka edalet? Wa waştişê înan bi ca bîyarê û keye hem zî tepişteyeyî zî nê zullmî ra xelas bibê."

 

'Ganî ma zî bikewê çalakî'

 

Şehrîban Bakir zî vat ganî her kes wayîrê grevê vêşanîye vejîyo û vat: "Ganî her cayê dinya ra wayîrê çalakîya vêşanîye bêro kerdene. Waştişê tepişteyan, waştişê heme şarî yo. Coka ganî ma pêro wayîr vejîyê û hemkarîya tepişteyan bikerê. Lazim o ke ma zî seba paştdayîşî teber de çalakîya grevê vêşanîye bidê destpêkerdene. Tewir bi tewir çalakî bikerê û bibê vengê înan. Ez veng dana pêro kurdan kena ke ma wirzê serê lingan û kîşte tepişteyan de ca bigîrê."

 

'Aştî qasê nan û awe girîng a'

 

Samîye Budak zî wina vat: "Waştişê şarê Kurdî ten aaştî ya. La dewlete hewext vera nê waştişî vejêna û zulm teda înan kena. Vera ke erey bimanê ganî berê zîndanan bêrê akerdene û tepişteyî biresê azadîya xo. Lazimîyê nê welatî bi qasê nan û awe bi aştîye esto. Heme kesî zî nê zanê. Ez seke dayîkek veng dana ke êdî wa aştîyêke mende bêro."

 

'Ganî heme kesî vengê xo berz bikerê'

 

Cinîya ke nêwaşt name û pênameyê xo pare bikera û vat: "Xemserdîyê hemverê grevê vêşanîye ke se rojî zêdeyêr pey xo verdayo, rewşêke şermezar kerdê. Ganî heme kesî vengê xo berz bikerê û seba çareserî têkoşîn bikerê. Wa game bêra eştene ke tepişteyî grev ra vejîyê. Ma pey çareserî yê la îqtîdar her ke şino zulm zêde keno û hêriş keno. Ma her wext waştişê aştîye kenê la vera aştîye ê hêriş kenê. La her ke serê ma de yenê fetisinê."