Dîlan Babat

 

COLEMÊRG - Dîyar Akin ke qedexeyê tebervejîyayîşê kuçeyan ê Geverî ke 79 rojî dewam kerd de, dinyaya xo bedilna la hema zî kiştoxê ci nêmaeyê vînayene. Dosyaya Dîyaro ke wextê xo pawitêne ame qetilkerdene, ameye padayene. Dayîka Dîyarî, Mehsîma Akin waşt ke dosya newe ra abo û gumanbarî bêrê muhakemekerdene.

 

Qezaya Geverî ya Colemêrgî de 13ê Adara 2015 de xoverdayîşê îdarekarîyê xoser ameyî destpêkerrdene û 79 rojî qedexeyê tebervejîyayîşê kuçeyan ame ciwîyayîş. Mengêke nê prosesî bi pêrodayîş û hêrişan dewam kerd. Nê operasyonan de welatijê ke nêwaştî keyeyê xo terk bikerê, yan ameyî qetilkerdiş yan zî mecbûr mendî herra xo terk bikerê. Yew keso ke kuçe de ame qetilkerdiş zî Dîyar Akino 15 serre bi. Dîyaro ke xo pêrodayîşan ra nimitibi û banêke keyeyî ra kewt, dimayê saetan dima ame vînayîş û gule ginabi qelbê ci ro. La pêwa ke 6 serrî derbaz bi zî cipersayîşêk derheqê hedîse de nêame kerdene, gumanbarî nêmaeyî vînayene.

 

'Nêverdayî lajê mi berê nêweşxane'

 

Gever de dimayê ke qedexe amebi îlankerdene,Dîyar seba derman pîyê xo rê bigîro şibi merkezê şaristanî û o zî sey xeylêk welatijan bi hedefê guleyê polîsan. Dîyaro ke şi merkezê şaristanî mîyanê pêrodayîşan de mend û seba ke xo bipawo şibi serê banê keyeyêke. Dimayê demêk Dîyar serê banî ra gineno erd ro û demêko derg birîndar erd de maneno. Dayîka Dîyarî, Mehsîma Akin vat ke welatijî ûca de Dîyarî ferq kerdê û wina vat: "Welatijî kenê mîyanê betanî ke berê nêweşxane la rayîr nêdayê ke welatijî berê. Berdê camî ûca û ûca de dayî vindarnayîş. Wesayîtêke firine yena lajê mi benê nêweşxane."

 

'Gule ginabi qelbê ci ro'

 

Mehsîmaye dewam de wina vat: "Lajê min o pîl geyra û vat, Dîyar birîndar bîyo. Ma şî nêweşxane kesî ma ra çîyêk nêvat. Doktoran vat, 'ma meşgul mekerê ma seba xelaskerdişê ci mudaxale kenê' dima ra oda ra vejîyayî û vatî wefat kerdo. Dîyar gama ke kewweno, ser sereyî ra keweno û gonî kewena zere. Mi birîne ey nêdî la gule ginabi qelbê ci ro. Dima ra seba otopsî Dîyarî berdê Colemêrg.”

 

'Dosya ameye padayîş'

 

Mehsîmaye dewam de dima ra seba îfade şîyê qerekole û vat: "Fotografê Dîyarî nîşanê ma dayî. Mi îfadeyê xo de vat, Dîyar seba derman bigîro şi merkezê şaristanî. Selahîyetdaran vat, 'çîyêk nêbeno xeylêk kesî ê emrî de ma kiştê.' Seba sebebê qetilkerdişê lajê mi bêro cigêrayîş ma muracat kerd la dosya sewîyeya dosya sewîyeya cipersayîşî de ame padayîş."

 

'Kerrayê gorî amebî şikitiş'

 

Mehsîmaye tewr peyîn wina vat: "Ez senîn şîya Gever şîya serê gorê lajê xo. Panzêre serê gorî ra derbaz bibî. Rêçe ci estbi. Gor pelçiqnabî. Kerrayê gorî şikyabî. Min û kênaya xo tay kom kerd. Keyeyê ma heme wêran bibi. La tena lajê mi zerrîya mi de bi. Heme çî veşnabî. La werrekna wa lajê mi biciwîyayîne, çîyêk pê nêameyîne. Her wext şinê goran xira kenê. Binê herre de zî rehetî nêdanê înan."

 

Mehsimaye sewbîna waştiş kerd ke wa dosya newe ra abibo, kiştoxê lajê aye bêro vînayene, berpirsîyarê cezaya xo biancê.