Melîke Aydin

 

ÎZMÎR - Burcu Oz hemverê camêrdo bi nameyê Furkan Tokal ke hewl dabi hêrişê cinsî bikero, pawitişê cewherî kerde. Burcu vat, dimayê gerrekerdişî, gumanbar serbest ameyo veradayîş la derheqê aye de qestî kes birîndarkerdiş ra dewa ameya akerdene. Burcuye reaksîyon ramojna û vat, nêfikrîyenê ke cinî zî xo pawenê.

 

Menga teşrîna verêne de camêrdo bi nameyê Furkan Tokal ke karê tamîrkerdişê awanî kerdêne, hewl da ke Burcu Oze rê hêrişê cinsî bikero. Burcuye pawitişê cewherî kerd û bi kardî ey birîndar kerd. Burcuye derheqê gumanbarî gerre kerd, qerarê durfistişî girewt.

 

Burcuye çîyê ke cuya qal kerd.

 

'Berê kesê ke tena keye de yê dayo piro'

 

Burcuye vat, seba ke gerre bikera şîya qerekole û vat: "Ez ameya keye, cîranî ameyî. Cîranan vat, gumanbar dayo berê kesê ke tena bîyê ro. Kamera verê berê mi de esta. Kamera boyax kerdê. Awanî de cinîyêke zî kaşê cayêko bêveng kerdo. Mi gerre kerd. Seba mi qerarê pawitişî vejîya. Dima ra Yewîneyê Şîdetê Mîyanê Keyeyî yê Midurîyê Bayrakli geyra. Vatê, belkî babeta keyeyî ya. Seba ke numareya Furkan Tokal paştrast bikerê geyrabî. Mi hedîse înan rê zî qal kerd. Vatî xo nêresnayê gumanbar. Teblîgê durvistişî nêresabi gumanbar. Seba nê hewl dayê."

 

'Keye cayê gumnabarî zano'

 

Burcuye dîyar kerd ke potansîyelê gumnabarî yê hêrişê tutan, astengdar û kal û pîran bikero esto û vat: "Tarîxê roniştişî dîyar nîyo. Dozgerî ra yan zî  cayêk bîn ra teblîgat nêameyo. Merdimê ey ameyî ozr waştî. Vatî seba ameyoxê tutî gerreyê xo peyser biancê. Mi zî vat, gerek bêro dermnakerdene. O 21 serre yo guna yo, ez zî 44 serrî ya guna nîya. Belkî ez o her wext travma biciwî. Keye cayê ci zano. Seba ke verê keyeyî ey berdibi verê polîsan."

 

Qerekole de sucdar ame vînayene

 

Burcuye vat, qerekole de sey sucdar ameya vînaye û vat: "Hedîse dîyar a. Persê rast pers bikerê, cewabê rast bigîrê. Xora ez travma cuyena. Mimkin nîyo ez o wext her çî bîyarî xo vîr. Mi nêberdî tipê edlî zî. Vatî, şo raporê derbkerdişê bixo bigîre. Ez şîya Nêweşxaneyê Dewlete ya Çîglî. Mi vat, ez raporê derbkerdişî gêna. Kes mi dir nêame. Seba pawitişê cewherî bi, mi avûkat zî nêberd. Ez tena şîya. Doktor eleqedar nêbê. Dimayê ke mi vat, ewnîya mi ra."

 

'Nêfikrîyenê ke cinî zî xo pawenê'

 

Burcuye vat nêfikrîyenê ke cinî zî xo pawenê û vat: "Çîyêk ez bikera çinbi. Mi bi lez hewl da ke xo xelas bikerî. Psîkolojîyê merdiman nêfikrîyenê. HEr kes eşkeno reaksîyonê îya bido. Ganî polîsî perwerdeyê psîkolojîk bigîrê. polîso ke cipersayîş keno, ganî perwerde bigîrê. Polîsî derheqê pêkerdişê Stenbolî de çîyêk nêzanê. Belkî ez biameyîne qetilkerdiş. Keso ke hewl dano tecawuz bikero, bi şertê kontrolê edlî yeno veradayîş. Ganî pêkerdişê Stenbolî bêro ca ardene. Ganî pêro cinîyî pawitişê cewherî bizan. Kesêko psîkolojîyê ey xirab o, nêeşkeno zor bido mi. Ez vinî nêkena. Her wext nê ra bawer a."