WAN - Zehra Arslana ke qeyûmî peynîya karê aye ard, pêwa qerarê dadgehe hema karê ci teslîm nêkerdê. Zehra ke nîweşa qelbî ya, wina vat: "Ganî mi 20 rojan ra reyke derzenî bidayîne xo ro. Bi hîrê serrî yo, nêeşkena bikerî. Eke çîyêk bêro sereyê mi, berpirsîyarî, kesê ke peynîya karê mi ardê."

 

17ê teşrîna peyêne 2016 de qeyûm tayînê şaredarîya Wanî ya DBPyî bibi û senîn qeyûm amebi, peynîya karê 653 kesî dabi. 3 serrî yo pêwa qerarê dadgehe, 306 karkerî bi hawayêke kêfî mulakat ra derbaz nêbenê. 306 karkeran ra 3 hebî ci ra dinyaya xo bedilnayî. Nê 3 kesan ra yew ci ra hacîz amebi serê keyeyê ey û krîzê qelbî derbaz kerdibi û dinyaya xo bedilnabi. Nika 303 karker zî bendeyê teslîmkerdişê karê xo yê. Nê karkeran ra yewe zî Zehra Arslan a. Zehra Nîsanê 2017 de kar ra ameye eştene, qelb ra nêrehet a û seba rewşa ekonomî nêeşkena derman biba.

 

Mobîng ame kerdene

 

Zehra bi 6 embazê xo yê cinîyan dir Îdareyê Kanalîzasyon û Awe ya Wanî (VASKÎ) dest bi kar kena û 6 serrî xebityena. Zehra vat, dimayê ke qayûm tayîn beno, rastê mobîngî yenê û vat: "Ma tawîz nêda hewldayîşê înan yê karvetişî rê. Ma karê xo kerd. La tewr peyîn, peynî dayî karê ma."

 

‘Serê karkerê cinîyan de şîne'

 

Zehra dîyar kerd ke dimayê tayînkerdişê qeyûman amîrê yewîneyî, înan teberê karî de zî dayîne xebitnayîş û vat: "Xeylêk serê cinîyan de ameyîne. Seba peyser game bierzê, xeylêk hewl dayî. Vatêne ma şaşîyêk bivînê û înan kar ra bierzê. Seba cinîyêke ekonomî zaf baş a û bi serran ekonomîya xo bi dest kerd. Wexto ke merdim pereyê xo qezenc bikero azad o. Çiqas merdimî vajê mêrdeyê merdimî zî, waştişê pereyî weş nêyo. Seba ke nika meaşê mi çin o, ez nêeşkena tutanê xo çîyêk bigîra. Karêko baş û dewamin ê mêrdeyê mi çin o. Ma her di zî nêxebityenê."

 

Zehra dîyar kerd ke nêweşa kronîkî ya qelbî ya û vat: "Verê mi kar ra vejê, ez şîya Stenbol de derman bîya. Şaristan de dermankerdişê ci çinbi. Stenbol de dermankerdişê balon kerdî. Ganî 20 rojan ra reyke biameyîne dermankerdiş. Nika nêeşkena bikera. Ganî ez xemgîn nêbî, xo nêdî zor. Sîgorteya mi îmkan bî. La dimayê ke kar ra ameya eştiş, no îmkan zî şi."

 

‘Mulakat bahane yo'

 

Zehra dîyar kerd ke 653 karkerê ke peynîya karê înan amebi dayene, yê ke nêgirewtî mulakat û dima ra girewtî zî estbî û vat: "Eke biwazê do bigîrê. Ma pêro rewşêka zehmet de yê. Ma debare xo kerdêne. Ma wazenê karê ma reyna teslîm bikerê. Ez nêeşkena dermankerdişê xo bikera. Çîyêk bêro sereyê mi, yê ke ma kar ra vetê yê."