WAN - Sekretera Cinîyan a Merkezê Pêroyî ya Egîtîm Senî Derya Yulcu dîyar kerd sebebê problemê perwerdeyî de polîtîkayê îqtîdarî yê û vat, hemverê nê rêxistinbîyayîşêko cinîyan ê xurt esto. Derya vat ke unîversîteya cinîyan zî dewamê polîtîkayê îqtîdarî ya.

 

Herême û Tirkîya de sîstemê perwerdeyî ameyo sewîyeya vindîkerdişî. Bi pandemî dir nê problemî her ke şî zêde bî. Pêwa nê bi tayînkerdişê qeyûman ê seba unîversîteyan, butçeyê kêm yê seba perwer de  yenê visnayene û xeylêk problemê bînî. Mengê vîyarte de serekomar Tayyîp Erdogan serdayîşê Japonyayî de derheqê unîversîteya cinîyan de vatibi, 'Ma welat de hemleyê nê erzenê' û unîversîteya cinîyan kerdibi bernameyê serra 2021î. Cayê unîversîte zî Hatay de amebi tercîhkerdene. Nê ser o reaksîyonê cinîyan dewam keno.

 

Sekretera Cinîyan ya Merkezê Pêroyî ya Egîtîm Senî Derya Yulcu dîyar kerd ke perwerde zî babetêke polîtîk o û seba nê zî îqtîdar goreyê polîtîkayê xo perwerde ferz keno.

 

'Wazenê cinîyan goreyê rolê cinsî pewerde bikerê'

 

Derya ard ziwan ke bi unîversîteya cinîyan wazenê mabêne cinî û camêrdan de dês bimûnê û vat: "Wazenê ke cinîyan komelî ra bivisnê û mahkumê hêzê karê cinsî bikerê, hepsê keyeyî bikerê. wazenê goreyê rolê cinsî cinîyan perwerde bikerê, rolê dayîktî, cinîtî de heps bikerê. Perwedeyê têmîyan, metodê perwerdeyê zanistî û yê weşîye yo. Ganî ziwan, dîn, bawerî, cinsê kesî, tu kesî eleqedar nêkero. Ganî nê pêro bi hawayêke azad bêrê ciwîyayîş. No zî seba perwerdeyê têmîyan girîng o. seba ke têduştîyê komelî dano averbîyayîş. Goreyê mi unîversîteyê cinîyan do zêde aver nêşêro. Îqtîdar bi serran o hewl dano ke lîseyê îmam xetîban pir bikero. La weçînetoxê înan bixo tutanê xo nêeşrawenê ûca. Seba ke merdim perwerdeyêko akademîk û zanistî wazeno. Fikrê unîversîteya cinîyan zî dewamê polîtîkayê îqtîdarî yo. Ma wazenê bi pêro rengê xo têhet biciwîyê."

 

'Ma wazenê îdarekar bixo weçînê'

 

Derya bale ant serê Melih Bulu ke seke rektorê Unîversîteya Bogazîçî bîyo û reaksîyonê wendekaran ard vîr û vat: "Helwestê Bogazîçî vejîyayo werte esas de hemverê heme polîtîkayê şaş yê îqtîdarî yo. Seba akademî komel roşn bikero esto. Têkoşînê wendekaran ê hemverê qeyûmê rektorî xeylêk bi mana yo. No esas de têkoşînê heqê demokratîk o. Ma wazenê îdarekarê mekteban, wendekarî biweçînê. Wendekarî heqê xo yê demokratîk xebitnayê, bi hewldayîşî yeno waştene ke bêro pelçiqnayene."

 

'Têkoşînê cinîyan xeylêk kan o'

 

Derya tewr peyîn wina vat: "Îradeyêke xurt ê cinîyan hemverê nê esto. Dimayê darbeyê 80ine dima têkoşînê cinîyan hîna pîl bi. Îradeyêke cinîyan ê xurt esto. Rêxistinbîyayîşêko cinîyan ê pîl esto. Seba ke heqê xo bigîrê têkoşîn kenê û dewam kenê. Îqtîdar nêeşkayo ma bitersno. Seba ke ma bitersno û bigîro binê serdestîyê xo muracatê her ca keno. La têkoşîn û xoverdayîş pîl beno. Do qetî bi serkewtişêk netîce bibo. Têkoşînê cinîyan bi qasê tarîxê merdimayî kan o."