Habîbe Eren

 

ENQERE - Yew kesa ke derheqê ci de fezleke ameya amadekerdene, Fatma Kurtulan ya HDPyij a. Fatma dîyar kerd ke hukm, rewşêke guneyê merdiman pê bêro ci de yo vat: "Ma xeylêk rey dî ke nê metodî veng vejîyayê. Ma nêzanê senî do bo la ma tîya de zelal ê: No metod, metod nîyo."

 

Hewteyê vîyarte de seba destnêdayîş wirzo 33 fezleke pêşkêşê meclîsî ame kerdene. 28 hebî fezleke derheqê 20 parlamenterê Partîya Demokratîke ya Şaran (HDP) de ame amadekerdene. Mîyan de hemsereka pêroyî ya HDPyî Pervîn Buldan, parlamenter Garo Paylan, Sezaî Temellî, Serpîl Kemalbay, Meral Daniş Beştaş, Saruhan Oluç, Pero Dundar, Huda Kaya û Fatma Kurtulan estbî. Çarçewaya cipersayîşê Kobanî de fezleke ameyê madekerdiş. 9 fezleke zî pêşkêşî Komîsyonê Têmîyan ame kerdene.

 

Heto bîn ra zî bi amancê wedaritişê destnêdayîşê 10 fezlekeyê bîn zî ameyî meclîs. 6 fezleke aîdê parlamenterê HDPyî bî. Derheqê parlamentera Mersînî ya HDPyî Fatma Kurtulan de 2018ine heta nika seba wedaritişê destnêdayîşê 8 fezleke ame amadekerdene. Fezlekeyê derheqê Fatma de ame amadekerdiş de, qiseykerdişê medyaya komelî yê hemverê tayînkerdişê qeyûman seba Şaredarîya Şarsitanê Gird ya Amedî ya 5ê Êlûle 2019 de ameyo kerdene de ca girewt. Fatma derheqê babete de ajansê ma rê qisey kerd.

 

'Goreyê xo fezlekeyan amade kenê'

 

Fatma fezlekeyê ke ameyê amadekerdiş de erjna û vat: "Seba mi û embazê xo qeyûmî, polîtîkayê AKPyî rexne kerd, suc ameyo vînayîş û fezlekeyan de ca gêno. Qiseykerdişê mi yê ke bîyê babeta suc dîyê, mi vato ke ma do têkoşînê xo berz bikerê. Vîyarte ra heta ewro ra babete fezlekeyan wina yo. Goreyê xo çîyan viraznenê û fezlekeyan amade kenê."

 

‘Rewşa hukmî baş nîyo'

 

Fatma dîyar kerd ke heme fezlekeyî absurt ê û wina vat: "Seba ke eşkerîyake hemserekê pêroyî kerdê, ma goşdarî kerdo, suc yeno vînayene. Mi fezlekeyê Kobanî ewnîya; ê zî eynî hawayî girewtê dest. Yanî çîyêk verçim çin o. Seba sebebê bela wila fezleke yenê amadekerdene. Bi rastî zî rewşa hukmî xeylêk xirabo. Êdî îtîbarê hukmî nêmendo. Çi heyf, hukm ardê rewşêka winasî."

 

'Do têkoşîn dewam bikero'

 

Fatma dewam de wina vat: "Çi heyf, vîyarte ra heta ewro hêrişêk esto. Gelo do fezlekeyan bivurnê pêlêko newe yê hêrişî, do hukmat qerarê no bido. No metod her wext ameyo ceribnayîş. Do têkoşîn nêqedîyo û nêqedîyayo zî. Heta Tirkîyêka demokratîke nêro awankerdiş do no problem zî nêro çareserkerdiş. Ma nê têkoşînî de bibê zî çinbî zî do têkoşîn dewam bikero."

 

'Kes nêterseno, nêpelçiqîno, xo nêdano kîşte'

 

Fatma bale ant serê munaqeşeyê wedaritişî destnêdayîşî û vat, do nê pêlî hêrişî zî netîceyêk nêvejîyo û nê çî vat: "1994 de zî eynî proses ame kerdene. Embazê ma yê DEPî 10 serran tepişteyî mendî. Wexto ke vejîyayî zî têkoşînê xo dewam kerdî. Kes nêterseno, nêpelçiqêno û nêdano kîşte. Yewin çareserî diyalog, muzakere û çareserîyê demokratîkî yê problemê kurdan o."