STENBOL - Endamê Însiyatîfê Dayîkê Aştîye ke bi amancê tecrîd bikerê rojeve û hetê muxalîf bikerê tevger, dest bi pêvînayîşê dîplomasî kerdî, no vengdayîş dayîkan rê kerdî: "Ma veng danê dayîkanê Tirkîya, wa destûr nêdê kiştiş û wa bêrê ma pîya vera şerî têkoşîn bikerê."

 

Tecrîdo giran yê serê Rayberê PKKyî Abdullah Ocalanî dewam keno. Şarê  Kurdî û dostê Kurdan her ca de waştiş kenê ke peynîya na rewşe bîyarê. Tepişteyê PKK û PAJKî zî bi amancê peynîkerdişê tecrîdî, dest bi grevê vêşanîye yê bêdem û bidor kerdibî. Grev roja 97ine de dewam keno. Pêwa pêro vengdayîşan selahîyetdarê hukmatî bêvengîye xo pawenê. Însiyatîfê Dayîkê Aştîye bi amancê tecrîd bikerê rojeve, grevê vêşanîye peynî bibê, dest bi pêvînayîşê dîplomasî kerdî. Dayîkan na çarçewa de bi Sereka Şubeyê ÎHD yê Stenbolî Gulseren Yolerî û parlamenterê CHPyî Sezgîn Tanrikulu dir pêvînayîş kerdî.

 

Dayîkê Aştîye do rojê ameyox de zî pêvînayîşê xo dewam bikerê.

 

'Ma wazenê vengê xo bidê eşnawitiş'

 

Dayîkê Aştîye Bedîa Gokgoz derheqê babete de ajansê ma rê qisey kerd û bale ant serê amancê serdayîşan û vat: "Tecrîdê serê Abdullah Ocalanî tesîr serê komelî de zî keno. Ma nêeşkenê vejîyê kuçeyanê xo. Ma nêeşkenê vengê xo biresnê tu kesî. Tutî ma grev de yê. Heq û huqûq ma ra girewtê. Serê ma de zî tecrîd esto. Seba ke tecrîd peynî bibo, ma bi demokrat, nuştox, pawitoxê heqî dir pêvînayîşan kenê. Ma hewl danê ke vengê xo bidê eşnawitiş. Ganî raya umumî zî vengê tepişteyan bieşnawa. Ganî waştişê tepişteyan bêrê ca. Waştişê tepişteyan, waştişê ma yê. Ma edlaet wazenê."

 

'Aştî bi kiştiş nîna'

 

Dayîka Aştîye Aklîme Keskîn zî wina vat: "Kiştiş çareserî nîyo. Wa tecrîd û kiştiş peynî bibê. Her cayê dinya de çareserî û aştîye serê masa de ya. Bi kiştiş aştî nîna. Bi serran o vanê, ma kurdî qedênayê la nêqedênê. Ma her ke şino hîna tewr zêde benê. Wa keyeyê polîs û leşkeran zî paştdayîş bidê ma. Wa verê ma de bê. Ma ber bi ber gêrenê. Ma do aştîye pîya bîyarê."

 

'Wa dayîkê leşker û polîsan paştdayîş bidê ma' 

 

Dayîka Aştîye Behiye Duman zî bale ant serê grevê vêşanîye û vat: "Tecrîd nîno qebulkerdene. Seba cenazeyî zîndanan ra nêvejîyê, ganî her kes hewl bido. Ma dejê dayîkê ke tutê xo Garê de vinî kerdê pare kenê. Ma veng danê dayîkê Tirkîya. Wa destûr nêdê kiştiş. Tutê selahîyetdaran leşker nîyê. Heme leşkerî tutê feqîran ê. Ganî ma dayîkî destê yewbînan bigîrê. Ma bibê yew ma do bieşkê tutanê xo xelas bikerê."