Hîkmet Tunç

 

Her wareyê cuye de cinî seba heqanê xo, xo ver danê. Yan bi tena sereyê xo yan bi keyeyê xo dir yan zî bi rêxistinî xo er danê. Labelê heme cinîyê ke xo ver danê zî ferq kenê ke bi rêxistinbîyayîş xo resnenê serkewtiş. Her cinîyêke vîrardişêkê ci esto û mîyan de dej û serkewtişêk esto. Ma waşt ke hîkayeya Şukran Şen û Emîne Bozkurt bîyarê ziwan.

 

‘Ez musaya ke bi duayan şîdet peynî nêbeno'

 

Hemsereka Partîya Demokratîke ya Şaran (HDP) ya Artemîtê Wanî Şukran Şen dîyar kerd ke di cinîyê pîyê aye estê û pîyê aye şîdet maye aye rê kerdo. Têkoşînê Şukrane bi cipersayîşê, "Ez senîn eşkena, maya xo a rewşe ra bixelisnî" dest pêkeno. 14 serrîya xo de bi zor çarşefa sîya danê pera. Şukrane, êdî taxe de dersê Quranî dana. Şukran wina vat: "Mi taxe de dersê Quranî da. Ez tewrê sohbetan bîne û mi pawitêne ke ganî cinî bibê, cinîyê tewr bi makûl. Dayîka mi her tim rastê şîdetê pîyê mi ameyîne. Mi her wext dua kerdêne ke şîdet peynî bibo. La dua qîm nêkerdêne. Ez cematî de bîya. Mi ra vatêne seba ke to çarşefe daya xo ra û camêrdî to nêvînenê û gunayê to zî çin ê. Dimayê demêk mi îmamtî kerd."

 

‘Mi çarşefe vera da’

 

Şukrane zî emrê xo yê qij de ameye zewicnayîş. Şukrane 2014 de tewrê xebatanê Meclîsê Cinîyan ê HDPyî bena û wina qal kerd: "Qiseykerdişê kombîyayîşan tesîr serê mi de kerd. Ez tewrê komîsyonê taxe bîya. Hemverê şîdetê serê cinîyan de ma xebate kerd. Seba ke emrê mi qij bi, nêeşkaya biba xebatkara fermî. Mi vernê de çarşefa xo eşte. Hemverê probleman ez bîya hêzê çareserî. Her ca de ma cinîyan vurnayîne, cinîyan zî ma vurnayîne. Ma problemanê înan çareser kerdêne. Felsefeyê cuya mivurya. Çi heyf, nêzdîbîyayîşê serdest yê camêrdan her ca de estbi. La êdî çareserî hîn tewr zêde zelal bî. Xêrcê têkoşînî rayîr çinbi. Nika ez hemsereka HDPyî Artemîtî ya û wina têkoşîn kena."

 

‘Ez bi vindertişê Ayşe Gokkan tesîr bîya'

 

Endama Komeleya Cinîyan ê STARî Emîne Bozkurt zî serranê 90yî de seba tedayê dewlete Colemêrg ra koçberê Payîzavayê Wanê bîya. Dimayê demêk zî ûca ra verê xo dayî qezaya Rêya Armûşî. Emîne qiseykerdişê xo wina dewam kerd: "Keye, seba nasnameyê kurdbîyayîşî rastê şîdetî ame. Mi emro qij de no ferq kerd. Ez mîyanê xebatanê baskê cinîyan ê HADEPî bîya. Xebatê cinîyan bale mi antêne. Mîyan de Ayşe Gokkan zî estbî, cinî ameyîne keyeyê ma. Mi sohbetê înan goşdarî kerdêne. Vindertişê Ayşe Gokkan xeylêk tesîr serê mi de kerd. Ez DOKH, KJA û TJAyî de aktîf xebityaya. Pîyê mi endamê meclîsê HADEPyî bi. Mi reaksîyonê ewil, camêrdê taxe ma ra girewt. Camêrdan vatêne, 'to karê ma destê ma ra girewto' no mi xemgîn kerdêne. La no nêbi sebeb ke ez karê xo ra fek vera bida."

 

'Xêrcê têkoşînî rayîrêk bîn çin o'

 

Emîne tewr peyîn qiseykerdişê xo de dîyar kerd ke Komeleya Cinîyan ya Starî û Tevgerê Cinîyan ê Azadan (TJA) 8ê Adare de bername organîze kenê û veng da pêro cinîyan ke tewrê bernameyî bibê û vera şîdetî têkoşîn bikerê. Sewbîna Emîne da zanayîş ke xêrcê têkoşînî rayîrêk bîn çin o.