AMED - Serdozgerîya Komare ya Bûrsayî muracatê avûkatanê Rayberê PKKyî Abdullah Ocalanî seba ke şêrê Îmrali û bi Abdullah Ocalan dir pêvînayîş bikerê, reyke bîn zî red kerd.

 

Avûkatanê Rayberê PKKyî Abdullah Ocalanî Newroz Uysal, Faîk Ozgur Erol, Cengîz Yureklî û Mazlûm Dînç seba ke muwekîlê xo bivînê serê sibayî muracatê Serdozgerîya Komare ya Bursa kerdbi. Muracatê avûkatan pê bahaneya qedexeyê 6 mengan nêame qebulkerdene.

 

Tewr peyêne Rezan Sarica û Newroz Uysal 8 serran da dima 2-22ê gulane, 12-18ê hezîrane û 7ê tebaxa 2019î de muwekîlê xo Abdullah Ocalanî reyde pêvînayîş kerdbi.

 

Dozgerîya Înfazî ya 2yine Bursa 23ê êlule de Abullah Ocalan û 3 tepişteyanê bînan rê qedexeyê pêvînayîşî yê 6 mengan da. 'Xerîteya Rayîrî' ya Ocalanî ya ke 2009 de erşawitbi Mehkemeya Heqanê Merdiman a Ewropa (MHME) sey bahaneya qedexeyî ameye pêşkêşkerdene.