Oznur Deger

 

ENQERE - Sendîkayê girêdayê KESKî dest bi amadekarîyê 8ê Adare kerdî, do bi sloganê "Vatişê ma yê ke ma vajê esto, hêzê ma yê vurnayîşî esto" wareyan de bê. Cinî do hewteyê 8ê Adare de do serê waştiş û bendewarîyê xo çalakîyê xo bi ca bîyarê.

 

8ê Adare Roja Cinîyê Dinya rê demêk kilm mend û her ca de xebat bêmabên kenê. Konfederasyonê Sendîkayê Kedkarê Îstîmlakî (KESK) û sendîkayê girêdayê ci Egîtîm Sen, SES zî do bi sloganê, "Vatişê ma ke vajê esto, hêzê ma yê vurnayîşî esto" 8ê Adare pîroz bikerê. Nê çarçewa de sekreterê cinîyan ê KESKî, Egîtîm Senî û SESî derheqê amadekarîyê xo de qisey kerdî.

 

'Ma xeta xo ya têkoşînî awan kenê'

 

Sekretera Cinîyan ê Pêroyî ya Egîtîm Senî Sîmge Yardim Dag vat, 8ê Adare seba înan zaf girîng o û vat, cinî 164 serrî yo seba têkoşînî kede, têduştî û azadî wareyê 8ê Adare de vera xo danê û vat: “Platformê cinîyan û rêxistinê cinîyan bi xebatêke pîl xo seba 8ê Adare amade kerdê. Ma cinîyê Egîtîm Senî zî plansazîyê xo kenê. Bi pandemî dir hemverê keda mamosteyan hêrişêk cidî virazya. Wareyê cuya kedkarê perwerde ame tengkerdene. Ma vera kiştişê cinîyan, heqê cuye, munaqeşeyê Pêkerdişê Stenbolî û seba têduştî û azadîya cinîyan xeta têkoşînê xo awan kenê."

 

Çalakî û bername

 

Sîmgeye derheqê bername û çalakîyê ke çarçewaya 8ê Adare de bêrê kerdene de wina vat: "Ma do nê hewte verê kargerîyê xo de eşkerayî bidê. Ma do kargerîyan bigeyrê. Şubeyê ma panel û komxebatan plan kenê. Ma do bernameyê çapemenîya komelî bi ca bîyarê. Heta destê ma ra bêro ma do xo biresnê cinîyan."

 

'Ma do keda cinîyan 8ê Adare de bîyarê ziwan'

 

Sekretera Cinan ê Pêroyî ya SESî Gonul Adibellî zî dîyar kerd ke 8ê Adare seba cinîyan zaf girîng û bi mana ya. Gonule dewam de wina vat: "Ma xebatê meclîsê cinîyan, hemserekîye û xebatê cinîyan esas gênê. SES do broşuran vejo. Ma do hemverê keda cinîyan ke nîna vînayene, şîdet, derheqê prosesê pandemî de û munaqeşeyê derheqê Pêkerdişê Stenbolî de, meydanê 8ê Adare de vengê xo berz bikerê. Ma fikrîyenê ke bi rêxistinê meslegî yê weşîye dir panelan bikerê û afîşan vejê. Eke ma nêbê zî do SES nê xebatan bikero. Bi serrêke yo seba pandemî xeylêk problemî ameyî ciwîyayîş. Kede nîna vînayîş. Ganî ma her wareyê cuye de bîyarê ziwan ke omidê ma esto û ma heqdar ê. Ganî pêro platformê cinîyan tewrê xebatan û bernameyan bibê."

 

‘Ma binê serdestîyê camêrdan de şinê 8ê Adare’

 

Sekretera Pêroyî ya KESKî Gulîstan Atasoy zî dîyar kerd ke pandemî texrîbatêk pîl kerdo û wina vat: "Problemê cinîyan yê cuye nê prosesî de hema tewr zêde bîyo. Barê cinîyan giran bîyo û şîdeto sîstamatîk yê dewlet-mêr pîl bîyo. Nê dir zî kiştişê cinîyan zêde bîyo. Ma binê serdestîyê camêrdan de şinê 8ê Adare. Problem û waştişê cinîyan 8ê Adare de bîyê hempar. Hewl yeno dayîş ke cinîyê KESKî rê bêvengkerdiş. La ma cinîyê kedkar bi şîarê ‘Vatişê ma yo ke ma vajê esto, hêzê ma yê vurnayîşî esto' vejîyê meydanan. Ma do hewl bidê ke 8ê Adare bi hawayêke tewr girseyî pêşwazî bikerê. Ma do bibê vengê cinîyê ke wayîrê bedenê xo vejênê."