Medya Uren

 

MÊRDÎN - Cinîyê Mêrdînijê seba tewrbîyayîşê çalakîyan veng danê cinîyan. Cinîyan pîya wina vatî: "Bêrê ma cinîyî pîya têkoşînê xo berz bikerê."

 

Ver bi 8ê Adare Roja Cinîyan ê Dinya kelecanê cinîyan Mêrdînî pîl beno. Bi startê ke Nisêbîn de ameyo dayene dir cinî dewe bi dewe, qeza bi qeza gêrenê çalakîyan vejênê û vengdayîşê tewrbîyayîşî kenê. Çalakkerê Tevgerê Cinîyan ê Azadan (TJA) yê ke tewrê nê çalakîyan benê ajansê ma dir qisey kerdî û vatî wa heme cinî wirzê û sere wedarnê.

 

‘8ê Adare nîşaneyê têkoşînê cinîyan o'

 

Şerîfe Taniran bale ant serê girîngiyê roja 8ê Adare seba cinîyan û vat: "Ver bi 8ê Adare ma cinî heme vejenê meydanan. Seba ke na roje nîşaneyê têkoşînê cinîyê kedkaran o. Bi rengê xo, bi nasnameyê xo na roje de têkoşînê xo nîşan bikerê û berz bikerê. Emsar bi taybetî wateyêke cîya yê roje esto. Seba dimayê demêke derg ma do pîrozbayîşêke bi girseyî viraznê. Bi taybetî zî prosesê ke şîdetê serê cinîyan de zêdebîyayîşî de bibo moralêko pîl. Vengdayîşê mi heme cinîyan ra yo ke bi rengê xo, bi cil û belgê adetî vejîyê meydan."

 

‘Roja cinîyê şorişgêr pîroz bo’

 

Safîye Kapçak zî sere de rojê cinîyê kedkar temamê cinîyê dinya pîroz kerd û dewam kerd: "Tarîxê kan heta roja ewro hêrişê serê cinîyan de kêm nêbi. Tu wext seke roja ewro zî hêrişî xidar nêbî. Bi her hawayî îqtîdarê camêrdan wazeno ke cinîyan mîyanê komelî de bido fetisnayîş. La ma vînenê tu wext cinî vera nê hêrişan têkoşînê xo vera nêdayê. Ma do tena 8ê Adare de ney, heme rojan de ramojnê ke ma cinî estê û ma do her wext tîya bê. Seba ma têkoşînê xo yê cinîyan pîl bikerê lazim o ma dest bidê yewbînan. Yê ke hizûr bîyarê, do serewedaritişê cinîyan bo." Safîye bi sloganê cinî ciwîyayîş azadî, biciwîyo têkoşînê cinîyan reyde qiseykerdişê xo qedêna.

 

'Do bi pêro cinîyan tewr zêde bixemlîyo'

 

Adîle Zengîn destpêkê qiseykerdişê xo de şayîyê 8ê Adare vîr ard û vat: "Roja cinîyan ma rê manaya têkoşînê dano. Ma bi ruhê cinîyê têkoşer ke ma rê mîras verdayê, dewr bigîrê. Ewro dem demê serewedaritiş û têkoşînî yo. Hemverê tecrîdî, hemverê binpaykerdişê heqan, hemverê her tewir bêheqî û şîdetî wext wextê serewedaritişî yo. Ma cinî ma do bi têkoşînê xo cuyêka newe awan bikerê. Seba nê ma pêro cinîyan dawetê çalakîya 8ê Adare kenê. Do pêro cinîyan dir 8ê adare hîna bixemlîyo."

 

‘Biciwîyo têkoşînê cinîyan'

 

Mulkiye Aslan zî tewr peyîn wina vat: "Hemverê heme hêrişan ma cinî têkoşîn kenê. Ma do tîya ra tepya zî bi heme hêzê xo dir xo ver bidê. Yeno zanayene prosesê peyîn de bi taybetî cinî rastê hêrişê dewlete yenê û rastê bêhuqûqî înan yê dade yenê. Bi desan embazê ma ameyî tepiştene û rastê şîdetê înan ameyî. Ewro seba çalakîya 8ê Adare ma hûmarêke zêde cinî kom bîyê. Roja peyîn de zî ma do bi temamî wirzê. Ma do ramojnê ke ma nêtersenê. Ma do pîya têkoşînê xo hîra bikerê." Mulkîye tewr peyîn bi sloganê cinî ciwîyayîş azadî, biciwîyo têkoşînê cinîyan reyde qiseykerdişê xo qedêna.