MERKEZÊ XEBERAN - Goreyê dayeyê ma kom kerdê, menga sibate de 24 cinî hetê camêrdê ke nêzdîyê înan ê ameyê qetilkerdene. 5 cinî bi guman dinyaya xo bedilnaye. 4 cinî bi hewldayîşê qetilkerdişê dir ameyî rî bi rî, sewbîna dadgehan de zî vistişê ceza ‘rewşa baş’ dewam kerd.

 

Tirkîya de kiştişê cinîyan de zêdebîyayîşêk zaf cidî esto. Tirkîya de tabloyê sîya yê babeta problemê cinîyan de nêvejêna û hema hema her roje hîrê cinî yenê qetilkerdene û no zî beno sebebê reaksîyonê pîlî. Pêwa nê îqtîdar kiştişê cinîyan de  helwestê xo yê vera cinîyan dewam keno. Rojê vîyarte de serekwekîla Koma AKPyî Ozleme Zengîn, derheqê munaqeşeyê cigêrayîşê zitî de ard ziwan û zîhnîyetê hemverê şîdetê serê cinîyan û hedîseyê kiştişê cinîyan reyke bîn ramojna. Nêzdîbîyayîşê îqtîdarî yê tewr zêde xo muhakeme de ramojna. Muhakeme tekelê îqtîdarî de yo û qerarê bêcezabîyayîşî zî şîdetê camêrdî zêde kenê.

 

25 cinî ameyî qetilkerdene

 

Goreyê dayeyê menga sibate yê ma kom kerdê, kiştişê cinîyan de û şîdetî de zêdebîyayîşêk cidî esto. 24 cinî hetê kesê nêzdîyê xo ra ameyî qetilkerdene. Kiştoxê cinîyêke nêame vînayene, 5 cinîyan zî bi guman dinyaya xo bedilnayî. 4 cinî bi hewldayîşê qetilkerdişî dir ameyî rî bi rî. 16 cinîyan rê şîdet û tecawuz ame kerdene. 5 tutan rê şîdet ame kerdene, 2 tutî ameyî qetilkerdene. 2 tutan bi guman dinyaya xo bedilna. Tutêk zî hêrişê cinsî ame kerdene. Sewbîna dadgehan de na menge de zî seba 5 gumanbaran rê rewşa baş ra ceza vist.