MÊRDÎN - Seba cinîyê ke tewrê çalakîyê 25ê Teşrîna Peyêne Roja Têkoşînê Vera Şîdetî Serê Cinîyan bîyê, bi bahaneyê qaydeyê janî binpay kerdê, cezaya pereyî înan rê ameye birnayene. Cinîyê TJAyî îtirazê na ceza kerdî û vatî: "Problemê înan vîrusê Koronayî nîyo, ê wazenê ke çalakîyanê ma asteng bikerê."

 

Seba 25ê Teşrîna Peyêne Roja Têkoşînê hemverê Şîdetê serê Cinîyan, Tevgerê Cinîyan ê Azadan (TJA) 7ê Teşrîna Peyêne 2020an de startê xebatê xo dabî. Çarçewaya nê xebatan de çalakkerê TJAyî 13ê menge de seba cinîyê ke ameyê qetilkerdene, qezaya Artuklî de çalakî balonan organîze kerdî. Polîsê ke ameyê cayê çalakîye, vera ke înan haydar bikerê yan zî qontrolê nasnameyî bikerê, bi bahaneyê vîrusê Koronoyî cezaya pereyî înan rê birnayene. her çalakkerî cezaya pere ame birnayene.

 

Derheqê babete TJAyî ke ceza înan rê ameye birnayene. Maqbûle Ozbey, Eylem Amak û Adulle Kaya qisey kerdî.

 

'Reya yewin bi polîsan astengî çalakî nêvet'

 

Maqbule Ozbey wina bale ant serê çalakîye û vat: "Çarçewaya 25ê Teşrîna Peyêne Roja Têkoşînê hemverê Şîdetê serê Cinîyan seke heme cayê ma zî dest bi xebatan kerd. Yeno zanaye ke rojê seke 25ê Teşrîna Peyêne û 8ê Adare seke rojê mîyanneteweyî yo. Ma zî do çarçewaya de seba cinîyê ameyî qetilkerdene balonî vistî hawa. Reya ewil bi ke polîsan ma rê problem nêvet û veng nêkerdî. Tena wesayîtêk polîsan pey ma de ame, o zî 3 kesî bî û dîmenan antêne. Bi dîmenê ke ma antê ceza ma rê birnayê. La cayê ke ma kom bî, cayêko akerde bi û ma mesafe kerdibi mabêne yewbînan. Pêwa nê keyfî ceza ma rê birnayê. No nêzdîbîyayîşêko keyfî yo û wazenê xebatanê ma asteng bikerê. La se bikerê zî ma do vera nê şîdetê serê cinîyan têkoşîn bikerê."

 

'Tena seba ma ceza birnenê'

 

Adulle Kaya zî bale ant serê cezaya ke ameye birnayene û vat: "Hûmara cinîyê ke çalakî de kom bî, 20 ra derbaz nêbi. O zî seba ke ware hîra bi mabêne ma de zî mabêneke hîra bî. Coka ma nêameyî îqazkeerdiş zî. Ma cezabirnayîşê înan ra nê netîce vejenê. Wazenê ke vera çalakîyanê ma de astengî vejê. La bi hezaran AKPyijî eşkenê seba kongreya xo wareyêk teng de kom bibê û temas bikerê la ceza tena ma rê ameya."

 

'Problem jan nîyo wazenê ke çalakîyanê ma asteng bikerê'

 

Eylem Amak zî erjnayîşê xo wina qal kerd: "Qeraro ke ameyo girewtene, qerarêk bi nasnameyê ma yê sîyasî ra girêdaye yo. Kesî rê mesafeyê komelî xem nêbi. Xora ma bi xo zî asayîşê xo girewtêne. Eke jan û asayîşê komelî hende girîng dest bigirewtêne no qayde tena ma rê ney, do kongreyê AKPyî rê zî derbazdar bîne. Wexto ke ma çalakî viraşt zî tena 2 polîsî verê ma de ca girewtî û bi tu hawa ma haydar nêkerdî. O wext ma zî şaş mendî. Reya ewil bi ke ê nêameyî astengî yan zî tehdîd ma rê nêkerdî. Roja 25ê Teşrîna Peyêne Roja Têkoşînê hemverê Şîdetê Serê Cinîyan de dayîşê ceza seba cinîyan bi sereyê xo qaydeyêk şîdetî yo. Problem jan nîyo, wazenê çalakîyanê ma asteng bikerê."