ENQERE - Vervatoxa Meclîsê Cinîyan ê HDPyî Ayşe Acar Başaran bale ant serê 8ê Adare û vat: "Pêwa heme polîtîkayê pelçiqnayîşî zî ma do bi tevgerê cinîyan dir seba serewedaritiş û azadîya xo bi şîarê ‘Bi xoverdayîş cinî rayrayîş kenê ver bi azadî rê’ pêro wareyê Tirkîya de bê.”

 

Vervatoxa Meclîsê Cinîyan ê Partîya Demokratîke ya Şaran (HDP) Ayşe Acar Başarane derheqê rojdemê cinîyan û hêrişanê vera endamanê HDPyî de kombîyayîşêkê çapemenîye kerd. Kombîyayîş Merkezê Pêroyî yê HDPyî de ame kerdene û parlamenterê cinîyî zî tewrê ci bîyî.

 

Ayşe bale ant serê hêrişê partîya xo û vat: “Persê 'Operasyon çira bîyo sebebê kişîyayîşan' hema zî bêcewab o. Cewab nêame dayene. Kesê ke ganî hesab bidê ameyî Meclîs û seba ke binkewtiş, şaşîyanê xo mîyan bikerê hêrişê muxalefet, partîya ma û cinîyan kerd. Wezîrê Karanê Zereyî Suleyman soyluyî cewab nêda persan. Soylu pê vatişê 'wekîlêke şîya Garê' zûr kerd. Fotografê wextê prosesê çareserîye yê Dîlan Taşdemîre pare kerdî. Derheqê hemsereka ma û wekîle Dîlane de lînç da destpêkerdene û nê hêrişî dewam kerdî. Garê de se bîyo ey hema zî cewab nêda.”

 

‘Cigêrayîşê zitî embazanê ma rê ferz kenê’

 

Ayşe, dîyar kerd ke cinî do vera hêrişan game peyser nêerzê û Ayşe reaksîyonê xo wina ramojna: “Ozlem Zengîn, cinîyê ke îşkenceyo cinsî înan rê ameyo kerdene, hedef girewt. Her çiqas nêro qebûlkerdene zî zabitnameyê meclisî de cigêrayîşê zitî ameyo tespîtkerdene. Cigêrayîşê zitî hemşaredara ma ya Colemêrgî Dîlek Hatîpoglû rê ame ferzkerdene û seba ke vera nê vejîyaye, ameye derpkerdene. Reyna 13 embazê ma yê Aydinî bi polîtîkayê dişminî ameyî destbendkerdene. Sucê înan têkoşînê cinîyan û îttîrazê îqtîdarî yo. Cigêrayîşê zitî embazanê ma rê zî ame ferzkerdene.”

 

‘Ma kesê sey Soylî zaf dîyê’

 

Ayşe derheqê 8ê Adare de zî qisey kerd û vat: “8ê Adare bena nêzdî. Ma hetêkî ra Kampanyaya 'Semedê Her kesî Edalet' anê ca hetêkê bînî ra zî agêrenê meydanan. Îqtîdar nêeşkno têkoşînê cinîyan hukm bikero. Pê şîarê 'Pê xoverdayoxîye cinîyî şinê ver bi azadîye' ma do her ca têgêrayîşê cinîyan reyde bibê. Ma edaletê camêrdan nêwazenê. Ma venga serekê şerî, Soylî danê ke ma sey to zaf merdimî dîyî ê zî ser nêkewtî ti zî do ser nêkewe.”