COLEMÊRG - Kadîfe Ayar ke taxa Emîrbaşanê qezaya Çelê ya Colemêrgî de ciwîyena, emrê qij de perwer de ra bêpar mende û berîwanîye kerd.

 

Kadîfe Ayar ke taxa Emîrbaşanê Çelê ya Colemêrgî de ciwîyena, emrê qij de pîyê aye, aye nêşawit mektebe û heta 17 serrî şiwanîye kerde. Kadîfe 17 serrî de ameye zewicnayîş û roja ke ameya zewicnayîş heta nika bi 21 serrî yo hem karê keyeyî kena û hem zî bi pesdewarî dir eleqedar bena. Kadîfe pêwa şertê giran yê zimistanî pesê xo rê ewnîyena.

 

Her çî pesê xo ra feyde gêna

 

Kadîfe ke tutîya xo ra ewnîyena hewnan ra vat ke bi no hawa cuya xo dewam kenê û wina dewam kerd: "Ma penîr, şit, mastê xo roşenê. Ma bi no hawa debare xo kenê. Ma her çî pesê xo ra feyde gênê. Ma kar û pesê xo ra razî yê."

 

'Mektebe bî ka karê ma şiwanîye bi'

 

Kadîfe qalê tutîya xo kerd û vat: "Mamoste her serê sibayî ameyîne keyeyê ma û vatêne, 'dedo Şerîf tutan bierşawe mektebe' pîyê mi vatêne, temam û dima ra ma nêerşawitêne. Her serre qeydê ma viraştêne, la ma nêşîne. Ma her serre vatêne, babî ma bierşawe la ma nêerşawitêne. Pîyê mi vatêne, bi ewnê heywanan ra. Dima ra ma zewicna. Çi heyf, emrê ma bi kar derbaz bi, ma nêşî mekteb."

 

'Goreyê verê şertî tewr baş ê'

 

Kadîfe dîyar kerd ke ê karê xo ra kêfweş ê û vat: "Verê kar û bar zehmet bi. Ma vaş bi destan antêne û arêdayîne. Nika her çî bi makînan yeno kerdene. Goreyê verê kar asan o. Axur hema verê keyeyê ma de yê. Awe, êm û vaş ma eşkenê peyda bikerê. Çend lajê mi estê. Mektebe wanenê. Ma serê sibayî wirzenê keye pak kenê û arayî amade kenê. Ma soba fînenê ta. Dima ra ma ewnîyenê heywananê xo ra. Zimistanê tîya zaf zehmet o. Seba nê tîya kar zî zehmet o."

 

Veterînerî kena

 

Kadîfe tewr peyîn qiseykerdişê xo de dîyar kerd ke tena berîwanîye nêkena, wexto ke heywanê nêweş kewenê ewnîyena înan ra û veterînerî kena. Kadîfe vatişê xo wina qedêna: "Wexto ke heywanî seqet benê, ma zanê birînê înan derman bikerê. Ez înan derman kena. Wexto ke nweş kewenê ma dermanê vîtamînî zî danê."