COLEMÊRG - Qezaya Çelêya Colemêrgî de arêyî 400 serrî bi awe xebityeno de berardişê tahînî yeno kerdene. Her sewîyeya xebata arê de keda cinîyan esta.

 

Dewa Biyadir ya Çelê ya Colemêrgî, arêyî tarîxî ke 400 serrî yo bi awe xebityeno, tahîn yeno berardiş. Tahîno ke arê ra yeno berardiş bi tehm û namdarîyê xo yeno zanayîş. Cinîyê ke arê de keda înan pîl a, berardişê tahînî ke kedêko pîl wazeno de ca gênê.

 

Nê cinîyan ra yew zî şert û mercê zehmetî yê viraştişê tahînî de ca gêna Ayten Demîr a. Aytene vat, Wan ra seba berardişê tahînî koç kerdê dewe û vat her sewîyeya xebata arê de keda cinîyan esta.

 

Viraştişê tahînî zehmet o

 

Aytene nê prosesê zehmetî qal kerd û vat: "Ma menga Gulane de dest bi ramitişî kenê. Dimayê hîrê mengan ra dima ma dest bi wedaritişê berardişî kenê. Ma kuncîyan kenê çuwal. Dima ra ma arê û tehnenê."

 

Cinî her sewîyeya ci de ca gênê

 

Aytene dewam de wina vat: "Ma kuncîyan rojêke yan zî 15 saetan seba dendikanê xo ra bivisyo ma awa soline de verdenê. Dimayê ke dendikî ci ra vejîyayî, kaşilê înan binê awe de maneno. Ma kuncîyê ke vejênê serê awe vejenê û dima ra şutenê. Dimayê şşutene ma makîne de weçînenê. Ma firine kolîyan de saetêke qelênenê. Dima ra ma kenê serdin û pak kenê. Dima ra ma benê arêyî û tehnenê."

 

No adetê pîr û kalanê ma yo

 

Aytene dewamê qiseykerdişê xo de dîyar kerd ke no mîras pîlan ra mendo û vat: "Pîr û kalanê ma ra mendo. Vistewrî û vistewreyê mi 120 serrî no kar kerdê. No kar vernîya înan zî ameyîne kerdene. Xeylêk kede wazeno. Di teneke kuncîyan ra tenekeyêke tahîn vejêno. Her karê zehmetî de cinî ca gênê. Her sewîyeya nê karî de zî cinî ca gênê."