BALIKESÎR - Aktîvîsta tevgerê Çerkezan Sema Nur Ozkan vat ke çerkezkî sey ziwanê bînan binê tehlûke de yo û vat, ganî hem Tirkîya û hem zî Rûsya dest polîtîkayê şoven vera bidê.

 

Tirkîya de 6 mîlyon Çerkez ciwîyenê. Aktîvîsta tevgerê Çerkezan Sema Nur Ozkan, dîyar kerd ke Tirkîya ganî seba azadîya ziwanan fek polîtîkayê şoven û panturkîst vera bido. Sema dîyar kerd ke Çerkezkî zî yew ziwanê ke binê tehluke de yo û vat, seba nê ziwanan bernameyê rehabîlîtasyonî bêrê caardiş.

 

‘Ziwan binê tehluke de yo'

 

Sema dîyar kerd ke ziwanê Çerkezkî ewro binê tehluke de yo û vat bi kursan hewl danê ke ziwan bidê ciwîyayîş û wina dewam kerd: "Ziwan ameyo sewîyeya çinbîyayîşî. Sebebê nê zî qirkerdişê împaratorîyê Rûsan ê 1864 de yo. Bi surgunê Çerkezyayî Çerkezî vila bî û no tesîro tewr pîl serê ziwanî de kerd."

 

Sema eynî wextî de dîyar kerd ke madeyê diyîn yê bîn zî şerê Xelisyayîşî yo û dimayê nê nufusê Çerkezan ê ciwanan beşêko pîl ameyo vinîkerdiş, lê asîmîlasyono esas dimayê şerê Xelisnayîşê bi Komara Tirkîya dir bi ca ameyo.

 

Ziwanê Çerkezkî ziwanê rojane ra visya

 

Sema wina vat: "Çerkezê ke xora vila ciwîyayîne, serrê 1960 de bi zorê kapîtalîzmî dir dewan ra koçê şaristanan bîyê. Seba nasname, ziwan û kultur nêameyî ciwîyayîş, parçe parçe bî. Nika ziwanê Çerkezkî cuya rojane ra visyayo. Ma wareyê bi sînor de ameyê bicakerdene. Sey akerdişê kursan. La ganî bernameyê rehabîlîstasyonî bêrê caardene. Ganî heqê têduşt bêrê caardene. Ma têduştî wazenê. Vernîye heme çî de ganî peynîya polîtîkayê asîmîlasyonî bîyarê. Bi kilmî ganî Tirkîya demokratîk bibo. Neslê newe seba serdestîyê ziwanê Tirkî xo baş nêeşkenê bidê şinasnayîş. No seba pêro şaran derbaz beno. Ziwanê Çerkezkî yeno xovîrrakerdiş."