ÊLIH - Amebi îdiakerdene ke Elvan Demîr  Stenbol de bi camêrdo ke ey dir zewicnaye Enver Demîr dir întîxar kerda. Dayîka Elvane, Leyla Akman, dîyar kerd ke aye bawer nêkena ke kênaya aye întîxar kerda û vat, sebebê merdişê aye hema nêameyo eşkera kerdene û waştiş kerd ke raporê otopsî ganî bêro vetene.

 

Elvan Demîr û mêrdeyê aye Enver Demîr ke Zeytînburnuyê Stenbolî de ciwîyayîne, 10ê Sibate de keyeyê xo de merde amebî vînayene. Amebi îdiakerdene ke Elvan û Enver seba problemê ekonomî peynîya cuya xo ardê, la xeylêk persî bendeyê cewabî yê.

 

Dayîka Elvane, Leyla Akman derheqê babete de qisey kerd ke aye bawer nêkena kênaya aye întîxar kerda û vat: "Enverî, verê zî seba deynan hewl da întîxar bikero. La Elvane nêverdabi. Hema zî sebebê merdişê kênaya mi nêameyo eşkerakerdene."

 

‘Çapemenî de cîya ameyo ramojnayîş'

 

Leyla dîyar kerd ke Enver bi bahîs kay keno û seba nê deynê estê û vat: "Seba nê zerdê aye ameyî destserkerdene. Kredî antî. Elvane seba nê her wext deyn waştêne. 4 mengîbi ke kîraya xo nêdabî. Ma nêzanayîne. Ma ra çîyêk nêvatêne zî çapemenî de cîya ame ramojnayîş. Vatibî, Elvane dergûşa xo berda keyeyê gorime xo. La nê zûr ê. Gorima aye vat, Enverî dergûşe daya tîya. Enver waya xo ra vano, ‘Elvane nêweş a, ez bena nêweşxane heta bêrî verê to de bo' her wina wexto ke yenê zere bedenê Elvane cemidnaye bîyo la yê Enverî germin bîyo.”

 

‘Enverî verê zî hewl dabi întîxar bikero’

 

Leyla dewam de vat, mergê Enverî ameyo eşkerakerdiş la yê Elvane nêameyo eşkerakerdiş û vat: "Dima ra raporê otopsî vejîyo do her çî dîyar bo. Bedenê Elvane de rêçe derban çin o. Bi derman zî întîxar nêkerda, mumkin nîyo. Ez nê ra bawer nêkena. Kesê ke şîyê keye zî derman filan nêdîyê. Çira sebebê merdişê kênaya mi eşkera nêkenê? Verê zî Enver hewl dabi întîxar bikero. La kênaya mi vernîya ci girewtibi.”

 

‘Ez o wayîrê emanetê kênaya xo vejîyî'

 

Leyla qiseykerdişê xo wina qedêna: "Enver şîrketê gazî de xebityayîne. Kênaya mi beşê muhaseba qedênabi. Enver, bi meaşê asgarî xebityayîne. La qîmê kîra, fature û deynê kredî nêkerdêne. Beno ke seba problemê ekonomî bo, laçira kênaya mi merda. Ma serê sibayî yewbînan dir qisey kerdibi. Morala aye baş bi. Hedîse şan de ra virazyaya. Dergûşa Elvane nika înan dir a. Şan de bermena dayîka xo gêrena. Ez nêwazena dergûşe înan dir bimano. Ez o wayîrê emanetê kênaya xo vejî. Wazena bîyarî verê xo."