Sara Şêx Hesen

 

HELEB - Resame Nadîye Mistefa heskerdişê xo yê hunerî wina qal kerd: "Her ke şîne tewr zêde musayîşê hunerê viraştişê resiman bena ke ez çîyê balkêş viraznena û berardişê xo komelî rê pêşkêş kena. Ganî merdim seba caardişê xeyalanê xo têkoşîn bikero."

 

Nadîye Mistefa 14 serrî ya û qezaya Cindirêsî ya Herêma Efrînî ra ya. Koçberkerdişê aye serê herra Efrînî ra ci rê nêbi astengî ke kar û wendişê xo dewam bikera. Nadîye tutîyî de heskerdiş û girêdayîşê aye bi şîrovekerdişî esto, bi rayîrê tabloyê xo xeyal û berardişê xo pêşkêş kena. Xêzkerdiş seba xo seke dinyayêka cîya vînena û bi rayîrê tabloyanê xo xeylêk beşdarê pêşengehan bîya. Nêzdîyê 30 tabloyê aye estê û waştişê aye o yo ke biba resamêka pîl ameyox de. Derheqê babete de Nadîye Mistefa ma rê qisey kerd.

 

'Efrîn şaristanê hunerî yo'

 

Destpêkê qiseykerdişê xo de Nadîye bale ant serê cuya xo ya Efrînî ya verê hêrişî û vat: "Ez xêzkerdiş ra zaf hes kena. Wexto ke ma Efrîn de bî cuya ma zaf weş bî. Mi bi ziwanê xo yê kurdkî wendişê xo kerdêne, la dimayê koçberkerdişî ma yê Efrînî reyna mi Şehbayî wendişê xo bi ziwanê xo dewam kerd. Şaristanê Efrînî şaristano hunerî yo. Keyeyê mi zaf paştdayîş da mi, seba ke ez xo hîna zaf aver berî. Wexto ke ma Efrîn ra vejîyayî, emrê mi qij bi. La hema zî çî vîrê mi de yê. Roja ma ke vejîyayê, m azaf zerrîveşaye bî, la çimê ma agêrayîşî yo. Ez hesrê çimanê dayîka xo, xo vîr ra nêkena. Ez zaf pê deja ya. Nika zî ez ê pêro hedîseyan bi rayîrê tabloyê xo ana vîrê xo û gane kena."

 

'Xeylêk tabloyê mi serê cuya dayîkan de ya' 

 

Nadîye dewam de wina vat: "Tewr zêde tabloyêke ez xêz kena, serê dayîk û tutan de yo. Dayikî seba tutanê xo xeylêk dej û zehmetîyan ancenê. Nimûe; gama ke ma Efrîn ra vejîyayî, dayîka mi hîna zaf omid dayîne ma. Sewbîna hîn tabloyê serê xoza ez viraznena, hacetê ke komelê ma verê xebitnayîne, ez tabloyan serê înan de zî xêz kena. Ez resiman bi komir viraznena. Her ke şino, tewr zêde hunerê viraştişê resiman musenaû bi wina ez çîyê balkêş viraznî û berardişê xo komelî dir pêşkêş bikerî."

 

'Ganî merdimî seba caardişê xeyalanê xo têkoşîn bikerê'

 

Nadîye tewr peyîn dîyar kerd ke her merdimêk seba xeylanê xo têkoşîn bikero û wina qedêna: "Merkezê kultur hunerî xeylêk pêşengeh akerdî û ez zî bi tabloyê xo beşdar bîya. Heta nika nêzdîyê 30 tabloyê mi estê, xeylêk kesê ke beşdarê pêşengehî bî tabloyê mi ecibnayî. Lazim o merdim seba xeyalanê xo têkoşîn bikero."