COLEMÊRG - Cinîyê ciwanî yê Colemêrgî derheqê grevê vêşanîye yê zîndanna seba tecrîdê serê Rayberê PKKyî Abdullah Ocalanî ra bêro wedaritene û binpaykerdişê heqan peynî bibê ame destpêkerdene, ercnayîş kerdî û dîyar kerdî ke ganî tecrîd bêro wedaritene û êdî azadî bêro.

 

Tepişteyê PKK û PAJKî bi amancê wedaritişê tecrîdo giran yê serê Rayberê PKKyî Abdullah Ocalan û binpaykerdişê heqan yê zîndanan 27ê Teşrîna peyêne 2020 de dest bi çalakîya grevê vêşanîye yê bêdem û bidor kerdî. Çalakî roja 78ine de dewam kena. Cinîyê Colemêrgî derheqê babete de ercnayîş kerdî.

 

'Wa tecrîd peynî bibo'

 

Hîlale Seven dîyar kerd ke ê wazenê caardişê tecrîdî peynî bibo û wina vat: "Seba tecrîdo ke Abdullah Ocalanî rê ameyo ferzkerdene, nika xeylêk embazê ma zîndanan de grev de yê. Ganî no tecrîd peynî bibo û ma nêwazenê xebara şehadetê embazanê xo bigîrê. Seba pandemî ra rewşa embazanê ma xora baş nîya. Seba nê ma wazenê tecrîd bêro şiknayîş. Tecrîd tena serê tepişteyan de ney, serê pêro şarê Kurdî de yo. Ma dest bidê yewbînan, ma do tecrîd bişiknê."

 

'Ma nêwazenê xebera şehadetan bêro'

 

Gulçîne Kaval zî dîyar kerd ke ê wazenê tecrîdê zîndanan bişiknê û wina vat: "Ma nêwazenê zîndanan de kes bimiro. Ma şarê kurdî wazenê ke dest bidê yewbînanan û vera nê vejîyê. Seba pandemî embazê ma problemê weşîye ciwîyenê. Pêwa nê kewenê grev. Ma cinîyê ciwanî çi destê ma ra bêro ma do bikerê. Ma nêwazenê xebera şehadetî bigîrê. Ma wazenê ke no tecrîd bêro şikitiş û embazê ma azad bibê."